’آپ بھینس، منگل سوتر ہوتے ہوئے مجرا تک آگئے، سماجی ڈھانچے کو نقصان نہ پہنچائیے‘، تیجسوی یادو کا پی ایم مودی کو مکتوب

بہار کے اپوزیشن لیڈر تیجسوی یادو نے پی ایم  مودی کو تین صفحات کا ایک خط لکھا ہے جو بہت تیزی سے وائرل بھی ہو رہا ہے۔ اس خط میں انہوں نے آئین اور ریزرویشن سمیت کئی مسائل اٹھائے ہیں۔ انھوں نے یہ خط اپنے سوشل میڈیا اکاؤنٹ پر پوسٹ کیا ہے۔ اس میں انھوں نے لکھا ہے کہ آپ ’بھینس‘، ’منگل سوتر‘ کے ذریعے ’مجرا‘ جیسے الفاظ تک آگئے۔ اب آپ سے اس بات کی کوئی توقع نہیں کہ آپ اپنے عہدے کے وقار کا خیال رکھیں گے اور گفتگو کے معیار کو بلند رکھیں گے۔

تیجسوی یادو نے اپنے خط میں لکھا ہے کہ جمہوری لڑائی لڑنے کے بجائے آپ جدوجہد کرنے والے ایک 34 سالہ نوجوان کو جیل بھیجنے کی دھمکی دے رہے ہیں۔ کیا آپ ایسی دھمکیاں دے کر آئین کی خلاف ورزی نہیں کر رہے ہیں؟ انتخابات تو آتے جاتے رہیں گے لیکن آئین، ملک کے سماجی نظام اور اس کے ڈھانچے پر مزید حملہ نہ کیجئے۔ تیجسوی یادو نے کہا ہے کہ آپ بہار آئے اور یہاں آکر بہت ہی جھوٹی، بے بنیاد باتیں کیں۔ آپ سے اب گفتگو کے بلندی کی کوئی امید نہیں ہے۔ تیجسوی یادو نے یہ بھی لکھا ہے کہ ایک بڑے دل والے ملک کے وزیر اعظم کی زبان کیا ایسی ہی ہونی چاہئے؟ آپ خود ہی سوچئے۔ انہوں نے آگے لکھا ہے کہ آپ کے انتخابی زبان کا گرتا پیمانہ ہی آپ کی سیاسی سوچ کا حقیقی عکاس ہے۔

آر جے ڈی لیڈر نے اپنے خط میں یہ بھی لکھا ہے کہ جب ہم بہار میں اقتدار میں آئے تو ہم نے ریاست کے خرچ پر ذات پر مبنی سروے کرایا۔ اس سروے کی روشنی میں ہم نے ریزرویشن کا دائرہ بڑھا کر 75 فیصد کر دیا اور آپ سے بار بار درخواست کرتے رہے اور ہاتھ جوڑ کر مطالبہ کرتے رہے کہ آپ اسے آئین کے نویں شیڈول میں شامل کریں لیکن وزیر اعظم صاحب، آب بنیادی طور پر پسماندہ ہیں اور دلت مخالف ذہنیت کے حامل ہیں۔ کون بھول سکتا ہے کہ 1990 میں جب منڈل کمیشن نافذ ہوا تو منڈل کمیشن کے خلاف احتجاج میں اڈوانی جی کے ساتھ آپ ریزرویشن مخالف رتھ کے سوار تھے۔ یہ بات بہوجن دلت برادری کیسے بھول جائیں گے۔؟