یوگی جی! بسوں پر بی جے پی کا بینر لگا لیجئے، مگر ہمارے جذبۂ خدمت کو مت ٹھکرائیے: پرینکا گاندھی

لکھنؤ: کانگریس کی جانب سے مہاجر مزدوروں کو ان کے گھروں تک پہنچانے کی ایک ہزار بسوں کی پیشکش کے معاملہ میں یوگی حکومت دباؤ میں آ گئی ہے۔ یہی وجہ سے کہ پہلے تو کانگریس سے تمام بسوں کی فہرست مع ڈرائیور کے نام اور فٹنس سرٹیفکیٹ لکھنؤ میں ہینڈ کرنے کو کہا اور جب چہار سو سے گھر گئی تو نوئیڈا اور غازی آباد میں ہی دستیاب کرانے کو کہہ دیا۔ اس کے بعد بھی بسوں کو یوپی کی سرحد کے اندر داخل ہونے کی اجازت نہیں دی۔

دریں اثنا، یو پی کانگریس کے صدر اجے کمار عرف للو کو درجن بھر کارکنان کے ساتھ آگرہ میں راجستھان کی سرحد پر دھرنا دینے کے بعد گرفتار کر لیا گیا۔ للو بسوں کو یو پی میں داخل کرانے کے مطالبہ پر بضد تھے مگر افسران نے ان کی ایک نہ سنی اور پولیس نے انہیں گرفتار کر لیا۔

پرینکا گاندھی نے اسی اثنا میں ٹوئٹ کر کے یوگی حکومت پر طنز کرتے ہوئے کہا، ’’یوپی حکومت نے حد کر دی ہے۔ جب سیاسی پرہیزوں کو درگزر کرتے ہوئے پریشان حال اور لاچار مہاجر بھائی بہنوں کو مدد کرنے کا موقع ملا تو دنیا بھر کی رکاوٹیں سامنے رکھ دیں۔ یوگی آدتیہ ناتھ جی ان بسوں پر آپ چاہے تو بی جے کا بینر لگا دیجئے، اپنے لیکن ہمارے جذبہ خدمت کو مت ٹھکرائیے۔‘‘

قبل ازیں، منگل کی صبح کانگریس نے بسوں کی فہرست، ان کا رجسٹریشن نمبر، ڈرائیور لائسنس اور گاڑی کا فٹ نیس سرٹیفکیٹ بھیجا ہے ۔اڈیشنل چیف سکریٹری اونیش اوستھی نے پرینکا گاندھی کے آفس کو پیر کی رات 11:40 پر خط لکھ کر کانگریس لیڈر سے بسوں کو دیگر ضروری معلومات کے ساتھ منگل کی صبح 10 بجے لکھنؤ کے ورنداون گراونڈ میں دستیاب کرنے کو کہا تھا۔

پرینکا گاندھی نے ایک اور ٹوئٹ میں کہا’’یوپی حکومت ہے کہ ہماری 1049 بسوں میں سے میں سے 879 بسیں جانچ میں صحیح پائی گئی۔ اونچا نگلہ بارڈر پر آپ کی انتظامیہ نے ہماری 500 بسوں سے زیادہ بسوں کو گھنٹوں سے روک رکھا ہے۔ ادھر دہلی بارڈر پر بھی 300 بسیں پہنچ رہی ہیں۔ برائے کرم ان 879 بسوں کو تو چلنے دیجئے۔ ہم آپ کو کل 200 بسوں کی نئی فہرست دلا کر بسیں دستیاب کرا دیں گے۔ بلا شبہ آپ اس فہرست کی بھی جانچ کیجئے گا۔‘‘ پرینکا نے کہا کہ لوگ بہت تکلیف میں ہیں، دکھی ہیں، ہم اور دیر نہیں کر سکتے۔

صبح 2:10 بجے کانگریس لیدڑ پرینکا گاندھی کے ذاتی سکریٹری نے اونیش اوستھی کو جواب دیتے ہوئے ایک میل میں لکھا ’’یوپی حکومت کا خط سیاست پر مبنی ہے اور مطالبہ کیا کہ یوپی حکومت خود سے پیر اڑانے کے بجائے نوئیڈا، غازی آباد اور غازی پور میں ایک نوڈل افسر تعینات کرے۔‘‘

تاہم، غوروخوض کے بعد کانگریس نے دوبارہ بسوں کی فہرست مع دیگر ضروری تفصیلات منگل کی صبح حکومت کے پاس بھیج دی۔ اس کے بعد ریاستی حکومت کے افسران نے دعوی کیا کہ کانگریس کی جانب سے جو رجسٹریشن نمبر حکومت کو بھیجے گئے ہیں ان میں سے متعدد آٹو، ایمبولنس اور کار کے ہیں۔‘‘

اگرچہ ریاستی حکومت نے بسوں کی فہرست میں آٹو، کار اور ایمبولنس کا معاملہ اٹھایا ہے لیکن اب حکومت دباؤ محسوس کررہی ہے اور ان گاڑیوں کو اب لکھنؤ کے بجائے غازی آباد اور نوئیڈا کے ضلع انتظامیہ کے حوالے کرنے کا حکم دیا ہے۔ پہلے ریاستی حکومت نے ان گاڑیوں کو لکھنؤ میں دسیتاب کرانے کو کہا تھا۔