یوگی حکومت نوجوانوں کو روزگار دینے میں کوئی دلچسپی نہیں لے رہی: اجے للو

بستی: اترپردیش کانگریس کے صدر اجے کمار للو نے ریاست کی یوگی حکومت پر الزام لگایا ہے کہ بی جے پی حکومت نوجوانوں کو روزگار دینے سے کنارہ کشی اختیار کرنا چاہ رہی ہے۔ للو نے جمعرات کو یہاں یو این آئی سے بات چیت میں کہا کہ مرکزی اور ریاستی حکومت کسانوں، نوجوانوں سے جھوٹے وعدے کر رہی ہے۔ نوجوانوں کو روزگار دینے میں ریاستی حکومت کترا رہی ہے۔ نوجوان بے روزگار ہوتے جارہے ہیں۔ ریاست میں دھان خرید مراکز غیر فعال ہیں۔ جہاں کسانوں کو کم داموں پر دھان فروخت کرنا پڑ رہا ہے۔ کسانوں کے گنا بقایاجات کی ادائیگی نہیں کی جارہی ہے۔ بجلی نظام میں کوئی بہتری نہیں ہے۔

اجے کمار للو نے کہا کہ ریاستی حکومت دیوالی کے بعد بجلی مہنگی کرنے کا تحفہ دے گی۔ بدعنوانی شباب پر ہے۔ ریاست میں درجنوں صحافیوں پر غیر قانونی ڈھنگ سے مقدمہ درج کیا گیا ہے جو کہ جمہوریت کے خلاف ہے لیکن ممبئی میں ایک صحافی کی گرفتاری پر مرکزی و ریاستی حکومت شور مچا رہی ہیں۔