مشکل میں بابا رام دیو، ’پتنجلی‘ پر ٹیکس چوری کا الزام، جانچ شروع

یوگا گرو بابا رام دیو کی کمپنی پتنجلی پر صارفین کو جی ایس ٹی شرح کی تخفیف کا فائدہ نہ دینے کا الزام عائد کیا گیا ہے۔ اس الزام کی وجہ سے پتنجلی جانچ کے دائرے میں آ چکی ہے۔ پتنجلی کے علاوہ اور کئی کمپنیوں پر بھی جی ایس ٹی شرح کی تخفیف کا فائدہ صارفین کو نہیں دینے کا الزام عائد کیا گیا ہے۔ ایف ایم سی جی کمپنی آئی ٹی سی بھی جانچ کے دائرے میں ہے۔

بزنس نیوز پیپر بزنس اسٹینڈرڈ کی ایک رپورٹ کے مطابق ڈی جی اے پی (ڈائریکٹوریٹ جنرل برائے انسداد منافع خوری) نے آئی ٹی سی کو اس سلسلے میں ایک نوٹس بھی جاری کیا ہے۔ آئی ٹی سی نے اس کی تصدیق کی ہے کہ انھیں ڈی جی اےپی کی طرف سے ایک نوٹس جاری ہوا ہے اور وہ انھیں ہر طرح کا تعاون فراہم کر رہے ہیں۔

غور طلب ہے کہ مرکزی حکومت نے 2017 میں 178 پروڈکٹس پر جی ایس ٹی میں تخفیف کی تھی۔ ان پروڈکٹس پر جی ایس ٹی کی شرح کو 28 فیصد سے گھٹا کر 18 فیصد کر دیا گیا تھا۔ ان دونوں کمپنیوں پر الزام ہے کہ انھوں نے تخفیف کا فائدہ صارفین کو نہ دے کر منافع خوری کی ہے۔ ڈی جی اے پی جی ایس ٹی ضابطوں کی بنیاد پر ان دونوں کمپنیوں سے پوچھ رہی ہے کہ جی ایس ٹی شرح میں تخفیف کا فائدہ صارفین کو ملا یا نہیں۔ ڈی جی اے پی ان کمپنیوں سے جاننا چاہتی ہے کہ اس دوران کتنی منافع خوری کی گئی۔

ڈی جی اے پی کے مطابق پتنجلی آیوروید نے اپنے ایف ایم سی جی پروڈکٹس پر جی ایس ٹی شرح میں تخفیف کے دن سے اگست 2018 تک کل 176 کروڑ روپے کی منافع خوری کی۔ ڈی جی اے پی بابا رام دیو کی قیادت والی پتنجلی پر منافع خوری کی جانچ کا پتہ لگانے کے لیے اس کا وقت مارچ 2019 تک بڑھا رہی ہے۔

پتنجلی اور آئی ٹی سی کے علاوہ ملٹی نیشنل کمپنی پروکٹر اینڈ گیمبل، جانسن اینڈ جانسن اور سیمسنگ جیسی کمپنیوں پر بھی صارفین کو جی ایس ٹی شرح میں تخفیف کا فائدہ نہ دینے کا الزام ہے۔ ان کمپنیوں پر گھٹی جی ایس ٹی شرح کا فائدہ صارفین کو نہ دینے کے لیے منافع خوری کے الزامات لگے ہیں۔