یشونت سنہا اٹل بہاری واجپئی کے نام پر بنائیں گے نئی پارٹی، جھارکھنڈ اسمبلی انتخاب سے قبل سیاسی ہلچل تیز

جھارکھنڈ میں اسمبلی انتخاب سے قبل سیاسی ہلچل کافی تیز ہوگئی ہے۔ جہاں ایک طرف سابق وزیراعلیٰ چمپئی سورین کا معاملہ سرخیوں میں ہے وہیں دوسری طرف اب بی جے پی کے سابق سینئر رہنما یشونت سنہا ایک مرتبہ پھر مرکزی سیاست میں واپسی کی قواعد میں لگ گئے ہیں۔ اس درمیان انہوں نے سابق وزیراعظم اٹل بہاری واجپئی کے نام پر نئی پارٹی بنانے کا بھی اعلان کر دیا ہے۔ اس سلسلے میں یشونت سنہا کی قیادت میں پارٹی کی تشکیل کا فیصلہ ہزاری باغ میں 'اٹل وِچار منچ' کی میٹنگ میں کیا گیا۔

میٹنگ میں جھارکھنڈ کی سیاسی صورتحال پر بات چیت کے بعد سیاسی پارٹی کی تشکیل کی تجویز پاس کی گئی۔ اس موقع پر یشونت سنہا نے کہا کہ آج کی سیاست چاپلوسی کی ہو گئی ہے۔ بھارت رتن اٹل بہاری واجپئی کے افکار پر چل کر ہی سماج اور معاشرہ کے لیے صاف ستھری سیاست کر کے ہر طبقہ کی بھلائی کی جاسکتی ہے۔ اس وقت ان کے خیالات اور اصول پر عمل کرنے کی شدید ضرورت ہے۔ انہوں نے مزید کہا کہ اس تنظیم میں سماج کے ہر طبقہ کے لوگوں کو جوڑا جائے۔ میٹنگ میں اٹل وچار منچ کے رہنماؤں اور کارکنوں نے اٹل جی کے خیالات پر عمل کرکے ان کے خواب کو شرمندہ تعبیر کرنے کی ہر ممکن کوشش کا عزم بھی کیا۔ حالانکہ یشونت سنہا کی قیادت میں اٹل بہاری واجپئی کے نام پر پارٹی کب تشکیل دی جائے گی اس کی جانکاری ابھی سامنے نہیں آئی ہے۔

غور طلب رہے کہ یشونت سنہا جنتادل اور بی جے پی کے بعد ممتا بنرجی کی قیادت والی ترنمول کانگریس کا بھی حصہ رہ چکے ہیں۔ گزشتہ صدارتی انتخاب میں اپوزیشن پارٹیوں نے یشونت سنہا کو ہی اپنا امیدوار بنایا تھا۔ ویسے ہزاری باغ سیٹ سے یشونت سنہا رکن پارلیمنٹ کی طویل پالی کھیل چکے ہیں جبکہ ان کے بیٹے جینت سنہا بھی اس سیٹ سے رکن پارلیمنٹ رہے ہیں۔