پہلوانوں کا احتجاج: برج بھوشن کے خلاف خاتون پہلوانوں کی 7 شکایات میں کیا کیا الزامات عائد کیے گئے؟

نئی دہلی: بی جے پی کے رکن پارلیمنٹ اور ریسلنگ فیڈریشن آف انڈیا کے چیئرمین برج بھوشن شرن سنگھ کے خلاف پہلوانوں کا احتجاج جاریی ہے۔ حال ہی میں سپریم کورٹ کی مداخلت کے بعد دہلی پولیس نے پہلوانوں کی شکایت پر برج بھوشن کے خلاف جنسی ہراسانی کے دو مقدمات درج کیے تھے۔ پولیس اسٹیشن میں درج ایف آئی آر کی تفصیلات اب منظر عام پر آئی ہیں۔ ایف آئی آر میں برج بھوشن پر جنسی مطالبہ، غلط طریقے سے چھونے سمیت کئی سنگین الزامات عائد کیے گئے ہیں۔

خیال رہے کہ 7 پہلوانوں نے 21 اپریل کو کناٹ پلیس پولیس اسٹیشن میں برج بھوشن کے خلاف شکایت درج کرائی تھی۔ ان شکایات کی بنیاد پر 28 اپریل کو برج بھوشن کے خلاف جنسی ہراسانی کے دو مقدمات درج کیے گئے۔ پہلی ایف آئی آر نابالغ کی طرف سے لگائے گئے الزامات پر مبنی ہے۔ اس سلسلے میں پوکسو ایکٹ کے تحت مقدمہ درج کیا گیا ہے، جبکہ دوسری ایف آئی آر دیگر پہلوانوں کی طرف سے لگائے گئے جنسی ہراسانی کے الزامات سے متعلق ہے۔

دونوں ایف آئی آرز میں آئی پی سی کی دفعہ 354 (عورت پر حملہ یا مجرمانہ زور زبردستی کرنا)، 354اے (جنسی طور پر ہراساں کرنا)، 354ڈی (تعاقب کرنا) اور 34 (عام ارادہ) کا حوالہ دیا گیا ہے، جس میں ایک سے 3 سال تک کی قید کی سزا ہو سکتی ہے۔ پہلی ایف آئی آر میں 6 پہلوانوں کے خلاف الزامات شامل ہیں اور اس میں ڈبلیو ایف آئی کے سکریٹری ونود تومر کا بھی نام ہے۔

دوسری ایف آئی آر ایک نابالغ کے والد کی شکایت پر مبنی ہے اور اس میں پوکسو ایکٹ کی دفعہ 10 بھی شامل ہے، جس میں پانچ سے سات سال تک قید کی سزا سنائی جا سکتی ہے۔ جن واقعات کا حوالہ دیا گیا وہ مبینہ طور پر 2012 سے 2022 تک ہندوستان اور بیرون ملک پیش آئے۔