جماعت اسلامی حیدرآباد کی جانب سے عید الفطر کی مبارکباد

حیدرآباد: محمد ارشاد الدین، ناظمِ شہر جماعت اسلامی ہند شہر حیدرآباد نے اپنے ایک صحافتی بیان میں اُن تمام عطیہ دہندگان کا شکریہ عطا کیا جنہوں نے کووڈ- 19 ریلیف کے سلسلہ میں بڑھ چڑھ کر حصہ لیا اور جماعت اسلامی کے بیت المال میں رقومات جمع کروائیں۔

اس تعاون کے نتیجہ میں الحمد للہ شہر حیدرآباد میں ہزاروں افراد تک پکی ہوئی غذا، راشن، نقد رقومات وغیرہ کے ذریعہ سے 3 کروڑ سے زائد روپیوں کی امداد پہنچائی جاسکی۔ اللہ رب العالمین سے دعا ہے کہ اللہ تعالیٰ تمام عطیہ دہندگان کے رزق میں برکت عطا فرمائے اور انسانیت کو کرونا کی آفت سے مکمل طور پر نجات عطا فر مائے۔

جماعت اسلامی اس موقع پر عید کی مبارکباد پیش کرتی ہے۔ یقینا یہ عید پچھلی عیدوں سے بہت مختلف ہوگی لیکن اللہ نے ہم کو اس بات کا موقع عطا کیا ہے کہ ہم نے رمضان کا اہتمام کیا، روزے رکھے۔ حتی المقدور خیر کے کام کیے۔ صدقات، خیرات، تذکیر، یاد دہانی، تلاوت قرآن، دعائیں، استغفار وغیرہ ساری چیزیں اُسی کے فضل سے کرنے کوممکن ہوسکیں۔

انہوں نے کہا کہ اس پر ہم اللہ رب العالمین کے شکر گزار ہیں اور عامۃ المسلمین کو عید الفطر کی مبارکباد دیتے ہیں اور اُمید کرتے ہیں کہ انشاء اللہ ہماری معمول کی زندگی واپس لوٹے گی۔ اُمت مسلمہ اپنے مشن کی طرف پلٹے گی۔ تحریکِ اسلامی انشاء ا للہ اس پورے عزم کے ساتھ اپنے اقامت دین کے نصب العین کے لیے جدو جہد کو جاری رکھے گی۔