آج شام 6 بجے پی ایم مودی بتائیں کہ چین ہندوستانی زمین کب چھوڑے گا: راہل گاندھی

کانگریس رکن پارلیمنٹ راہل گاندھی اس وقت اپنے پارلیمانی حلقہ وائناڈ کے دورہ پر ہیں۔ اپنے تین روزہ دورہ کے دوسرے دن منگل کی صبح انھوں نے کورونا بحران کو لے کر میٹنگ کی اور پھر بوقت دوپہر پریس کانفرنس کیا جس میں انھوں نے میڈیا کے ذریعہ پوچھے گئی کئی سوالوں کے جوابات دیے۔ پی ایم مودی کے ذریعہ آج شام 6 بجے ملک کے نام خطاب کے تعلق سے پوچھے گئے ایک سوال کے جواب میں راہل گاندھی نے کہا کہ "میں پی ایم (مودی) سے سننا چاہوں گا کہ ہندوستانی علاقہ کو چین کب چھوڑے گا۔ لیکن میں آپ کو اس بات کی گارنٹی دیتا ہوں کہ پی ایم میں یہ بتانے کی ہمت نہیں ہے۔ پی ایم چین کے بارے میں ایک لفظ نہیں بولیں گے۔"

پیر کے روز فاروق عبداللہ سے ہوئی انفورسمنٹ ڈائریکٹوریٹ (ای ڈی) کی پوچھ تاچھ سے متعلق جب راہل گاندھی کا نظریہ جاننے کے لیے صحافیوں نے سوال کیا تو انھوں نے واضح لفظوں میں کہا کہ "موجودہ حکومت ایجنسیوں کو سیاسی ہتھیار کی طرح استعمال کر رہی ہے۔ اگر کوئی سیاسی طور پر وہ نہیں کرتا جو وہ (پی ایم مودی) چاہتے ہیں تو انھیں لگتا ہے کہ وہ سی بی آئی اور ای ڈی کا استعمال ان پر دباؤ بنانے کے لیے کر سکتے ہیں۔" ساتھ ہی راہل گاندھی نے یہ بھی کہا کہ "کئی لوگ اس طرح کی جانچ کا سامنا کر رہے ہیں، میں بھی اس کا سامنا کر رہا ہوں۔ میرے خلاف کئی معاملے ہیں۔"

اس درمیان راہل گاندھی نے کیرالہ میں کورونا انفیکشن کے پھیلاؤ میں ہوئے اضافہ کے تعلق سے بھی بات کی۔ انھوں نے کیرالہ دورہ کے دوران وہاں کے حالات کو دیکھتے ہوئے ایک ٹوئٹ بھی کیا ہے جس میں کورونا انفیکشن کے پھیلاؤ کے لیے مرکزی اور ریاستی حکومت کو ذمہ دار ٹھہرایا ہے۔ انھوں نے اپنے ٹوئٹ میں کہا ہے کہ "میں نے اپنے انتخابی حلقہ میں کووڈ مینجمنٹ کا جائزہ لیا۔ ریاستی اور مرکزی حکومت الزام در الزام کا کھیل رہی ہیں، جب کہ کورونا تیزی کے ساتھ پھیل رہا ہے۔ اس وقت سبھی کو چاہیے کہ وہ کورونا کو شکست دینے پر اپنی توجہ لگائیں۔"