’کووی شیلڈ کے لیے 84 دنوں کا انتظار کیوں؟‘ مودی حکومت سے کیرالہ ہائی کورٹ کا سوال

کیرالہ ہائی کورٹ نے منگل کے روز مرکز کی مودی حکومت سے یہ بتانے کو کہا ہے کہ کووی شیلڈ ویکسین کی پہلی خوراک لینے کے بعد آخر دوسری خوراک لینے کے لیے 84 دنوں کا انتظار کیوں کرنا پڑتا ہے۔ عدالت نے یہ بھی پوچھا ہے کہ اگر ٹیکے خود کسی فریق یا پارٹیوں کے ذریعہ درآمد یا حاصل کر لیے جائیں تو کیا وقت کے فرق کو کم کرنا ممکن ہے۔

عدالت نے یہ تبصرہ کائٹیکس گروپ کی کمپنیوں کے ذریعہ داخل ایک عرضی پر سماعت کے دوران کی، جس میں کہا گیا تھا کہ شروع میں کووی شیلڈ کی دوسری خوراک لینے کی مدت کار 45 دن تھی۔ عدالت نے پوچھا کہ کیا وقت کا فرق اس لیے بڑھایا گیا تھا کیونکہ اس کے بہتر اثرات دیکھے گئے تھے، یا پھر یہ وقت پر ٹیکوں کی سورسنگ میں مسائل کے سبب بڑھایا گیا تھا۔ عدالت نے مرکز سے ان ایشوز پر اپنا حلف نامہ دینے کو کہا ہے اور معاملے کو جمعرات کے لیے مقرر کر دیا ہے۔