گائے کے دودھ سے تیار پرساد کھانے والوں کو کیوں دیا جا رہا ریبیز کا انجکشن؟

چھتیس گڑھ کے گونڈاہور علاقہ میں ایک حیرت انگیز معاملہ سامنے آیا ہے جہاں دو گایوں کا دودھ استعمال کرنے والوں کو ریبیز کا انجکشن لگایا جا رہا ہے۔ بتایا جا رہا ہے کہ ایسا اس لیے کیا جا رہا ہے کیونکہ گاؤں میں موجود ایک پاگل کتے نے دودھ دینے والی دو گایوں کو کاٹ لیا تھا جو اس واقعہ کے تقریباً دو ماہ بعد مر گئیں۔ پتہ چلا کہ ان دونوں ہی گایوں کی موت ریبیز کی وجہ سے ہوئی ہے۔ یہ خبر پھیلتے ہی گاؤں والوں میں ایک خوف کی لہر پھیل گئی۔

ایک میڈیا رپورٹ میں بتایا جا رہا ہے کہ گایوں کے مالک نے نہ صرف اس کے دودھ کو علاقہ میں فروخت کیا، بلکہ علاقہ میں ہوئی ’ستیہ نارائن کی کتھا‘ کے بعد تقسیم کیے گئے پرساد کو تیار کرنے میں بھی اس دودھ کا استعمال کیا گیا۔ جب اس پرساد کو کھانے والوں تک یہ خبر پہنچی کہ ان گایوں کی ریبیز سے موت ہو گئی ہے جن کے دودھ سے پرساد تیار ہوا تھا، تو وہ خوف میں مبتلا ہو گئے۔ پھر ریبیز کا انجکشن لگانے کا مشورہ ہوا اور محکمہ صحت کی ٹیم نے گاؤں میں کیمپ لگا کر دیہی عوام کو ریبیز کے انجکشن لگائے۔

مقامی لوگوں کا کہنا ہے کہ گایوں کے مالک کو اس کی جانکاری تھی کہ اسے کتّے نے کاٹا ہے۔ اس نے رازداری کے ساتھ اسپتال جا کر پہلے ہی ریبیز کا انجکشن لگوا لیا تھا۔ جب یہ بات پھیلی تو لوگوں میں ایک ڈر کا ماحول پیدا ہو گیا۔ حالانکہ محکمہ صحت کے ایک افسر نے کسی بھی خطرہ سے انکار کیا ہے۔ اس کا کہنا ہے کہ دودھ پینے اور اس کی مٹھائی کھانے سے ریبیز کا خطرہ نہیں ہے۔ پھر بھی ریبیز کا انجکشن احتیاط کے طور پر لگایا گیا ہے۔

بتایا جاتا ہے کہ معاملہ پنکھاجور کے وویکانند گرام پنچایت کے گاؤں پی وی-4 کا ہے۔ اس گاؤں میں دودھ ڈیری کا کام بڑے پیمانے پر ہوتا ہے۔ دو ماہ قبل ایک پاگل کتے نے دو گایوں کو کاٹ لیا تھا جو ایک ساتھ تھے۔ اس کی خبر گایوں کے مالک کو تھی، پھر بھی وہ روزانہ کی طرح دودھ فروخت کرتا رہا۔ دو ماہ بعد جب گایوں میں ریبیز پھیلنے سے ان کی موت ہو گئی تو ان کے مالک نے خاموشی کے ساتھ، بغیر کسی کو کچھ بتائے اسپتال جا کر ریبیز کا انجکشن لگوا لیا۔