اعظم خان کے بیٹے اور بیوی نے یکساں اسمبلی سیٹ سے پرچہ نامزدگی کیوں داخل کیا؟

اعظم خان جیل میں بند ہیں، لیکن ان کی بیوی تزئین فاطمہ اور بیٹے عبداللہ اعظم نے سماجوادی پارٹی کی طرف سے یکساں سیٹ پر پرچہ نامزدگی داخل کر سب کو حیرت میں ڈال دیا ہے۔ الیکشن کمیشن کی ویب سائٹ کے مطابق محمد عبداللہ اعظم خان اور ان کی ماں تزئین فاطمہ رام پور ضلع کی سوار اسمبلی سیٹ سے اپنا حلف نامہ داخل کیا ہے۔ ایک ہی سیٹ پر سماجوادی پارٹی کی طرف سے دوہری نامزدگی پر پارٹی ترجمان عباس حیدر کا کہنا ہے ’’ہم نے دیکھا ہے کہ بی جے پی کی قیادت والی حکومت نے رام پور کی ترقی کرنے والے ایک سابق وزیر کو بکری اور سائیکل چوری جیسے چھوٹے معاملوں میں پھنسایا ہے۔ وہ ہمارے امیدواروں کی نامزدگی میں بھی ہیر پھیر کر سکتے ہیں اور سیاسی بدلہ لینے کے لیے ان کے انتخاب لڑنے پر رخنہ انداز ہو سکتے ہیں۔‘‘

عباس حیدر نے کہا کہ سماجوادی پارٹی انتخابات میں اتر پردیش سے بی جے پی اور اس کے ’جنگل راج‘ کو ختم کرنے کے لیے پرعزم ہے۔ سماجوادی پارٹی کے امیدواروں کی فہرست کے مطابق سوار سیٹ سے محمد عبداللہ اعظم خان امیدوار ہیں۔ اس سے اندازہ لگایا جا سکتا ہے کہ اگر عبداللہ اعظم کے سامنے کوئی رخنہ پیدا نہیں کیا گیا تو تزئین فاطمہ اپنے قدم پیچھے کھینچ سکتی ہیں۔

واضح رہے کہ اتر پردیش میں سات مراحل میں ہونے والے انتخاب کے دوسرے مرحلہ یعنی 14 فروری کو سوار میں ووٹنگ ہونی ہے۔ جعلسازی اور زمین پر قبضہ جیسے معاملوں سمیت کئی الزامات کے تحت معاملہ درج ہونے کے بعد اعظم خان، ان کی بیوی اور بیٹے نے 2020 میں رام پور کی ایک عدالت میں خودسپردگی کر دی تھی۔ فاطمہ کو 2020 میں ضمانت مل گئی اور عبداللہ اعظم کو رواں سال جنوری میں تقریباً دو سال کی قید کے بعد رِہا کر دیا گیا۔

قابل ذکر ہے کہ اعظم خان اب بھی جیل میں بند ہیں۔ انھوں نے 2017 کے انتخاب میں رام پور اسمبلی سیٹ سے 47 فیصد سے زیادہ ووٹ حاصل کر کے جیت درج کی تھی۔ بعد میں وہ 2019 میں لوک سبھا کے لیے منتخب کیے گئے اور ضمنی انتخاب میں فاطمہ رام پور سیٹ سے رکن اسمبلی بنیں۔ ان کے بیٹے عبداللہ اعظم نے 2017 میں اپنے پہلے انتخاب میں سور اسمبلی سیٹ سے جیت حاصل کی تھی۔