آر بی آئی کا فنڈ لینا چاہتی ہے مودی حکومت، جالان کمیٹی کی میٹنگ میں ہوگا فیصلہ

انڈین ریزرو بینک (آر بی آئی) کا فنڈ اور منافع حکومت کو منتقل کیے جانے کے مسئلے پر سنٹرل بینک کے سابق گورنر بمل جالان کی صدارت والی کمیٹی پھر میٹنگ کر اپنی رپورٹ کو آخری شکل دے گی۔ کمیٹی میں وزارت مالیات سے نامزد رکن سابق سکریٹری برائے مالیات سبھاش چندر گرگ کا تبادلہ دوسری وزارت میں ہو گیا ہے، جس سے کمیٹی میں ان کی جگہ خالی ہو گئی ہے۔

کمیٹی کے سربراہ بمل جالان نے اس بارے میں بتایا ہے کہ "آر بی آئی اب یہ فیصلہ کرے گا کہ صحیح معنوں میں کیا کیا جانا چاہیے۔ لہٰذا میں اس وقت کوئی تبصرہ نہیں کر سکتا۔ آر بی آئی اور حکومت کے ذریعہ اس خالی پن کو بھرنے کا فیصلہ کیا جائے گا۔ لیکن میں اس عمل میں شامل نہیں ہوں۔" ان سے جب پوچھا گیا کہ کیا کمیٹی کی میٹنگ پھر ہوگی تو اس پر انھوں نے کہا کہ اس کا امکانات زیادہ ہیں۔

ابھی تک جو حالت ہے، اس میں سابق سکریٹری برائے مالیات سبھاش چندر گرگ کا تبادلہ وزارت بجلی میں ہونے کے بعد کمیٹی کی دوبارہ میٹنگ ہو سکتی ہے۔ حالانکہ اس بات کی ابھی تصدیق نہیں کی جا سکتی ہے۔ یہ یقینی نہیں ہو سکا ہے کہ گزشتہ میٹنگ میں جو طے ہوا تھا، اسی کی رپورٹ پر حکومت کے نئے نامزد اراکین کا دستخط کرا لیا جائے گا یا وزارت مالیات سے نامزد کیے جانے والے نئے رکن کے ساتھ اسی ایشو پر پھر سے صلاح و مشورہ کیا جائے گا۔

سبھاش چندر گرگ کی جگہ اتنو چکرورتی وزارت مالیات میں معاشی معاملوں کے سکریٹری بنے ہیں۔ حکومت نے ابھی تک نئے سکریٹری برائے مالیات کے نام کا اعلان نہیں کیا ہے جب کہ وزارت مالیات میں بینکنگ سکریٹری راجیو کمار سب سے سینئر آئی اے ایس افسر ہیں۔

آر بی آئی کی معاشی پونجی فریم ورک پر بمل جالان کمیٹی تبادلہ خیال پورا کرنے کے بعد اپنی رپورٹ سونپنے والی تی، لیکن کمیٹی کو گرگ کا تبادلہ ہونے کے بعد نامزد رکن بدلنے پر حکومت کے فیصلے کا انتظار کرنا ہوگا۔ چھ رکنی اس کمیٹی میں گرگ شامل تھے، اور وہ تنہا ایسے رکن تھے جنھوں نے کمیٹی کے فیصلے کی مخالفت کرتے ہوئے اس پر دستخط کرنے سے منع کر دیا تھا اور اپنی نااتفاقی کا اظہار کیا تھا۔

حالانکہ کمیٹی نے نااتفاقی سے متعلق گرگ کے تبصرہ کو شامل کر رپورٹ کو منظوری دینے کا فیصلہ کیا تھا۔ سکریٹری برائے بجلی کی ذمہ داری سنبھالنے کے بعد گرگ نے کہا کہ انھوں نے رپورٹ پر اس لیے دستخط نہیں کیا کیونکہ اسے آخری شکل نہیں دیا گیا تھا۔

آر بی آئی کے سنٹرل بورڈکی میٹنگ 16 اگست کو ہوگی۔ گزشتہ بار کمیٹی کی میٹنگ 18 جولائی کو ہوئی تھی، جس میں آر بی آئی کے ذریعہ حکومت کو کی جانے والی منتقلی کی رقم پر فیصلہ کیا گیا تھا۔ طے رقم کی منتقلی ایک بار میں نہ کر کے تین سے پانچ سال کی مدت کے دوران کیے جانے پر اتفاق ہوا تھا جس کی گرگ نے مخالفت کی تھی۔