بزرگ جوڑے کے گزارہ بھتہ کے معاملے میں جج کا تبصرہ، ’لگتا ہے کلجگ آ گیا!'

عمر کے 75 سے 80 سال گزار چکے بزرگ جوڑے کا ایک معاملہ جب الٰہ آباد ہائی کورٹ پہنچا تو اسے دیکھ کر جج بھی حیران رہ گئے۔ گزارہ بھتہ سے متعلق اس معاملے پر جج نے دلچسپ تبصرہ کرتے ہوئے کہا 'لگتا ہے کلجگ آ گیا ہے!‘

دراصل بزرگ خاتون اپنے شوہر سے گزارہ بھتہ پانے کے لیے عدالت پہنچی تھیں۔ اس پر بنچ نے جوڑے کو صلاح دی ہے کہ وہ آپس میں صلح کرلیں اور اس طرح کی مقدمہ بازی سے بچیں۔ اسی معاملے پر جج نے حیرانی ظاہر کرتے ہوئے کہا کہ ایسا لگتا ہے کہ کلجگ آ ہی گیا ہے۔

علی گڑھ کے مُنیش کمار گپتا کی عرضی پر سماعت کرتے ہوئے جسٹس سوربھ شیام شمشیری نے کہا کہ یہ قانونی لڑائی تشویش کا موضوع ہے۔ انہوں نے بزرگ جوڑے کو صلاح دینے کی کوشش کی۔ ساتھ ہی ہائی کورٹ نے اہلیہ کو نوٹس جاری کرتے ہوئے کہا کہ اسے امید ہے کہ اگلی سماعت کی تاریخ تک وہ کسی سمجھوتے پر پہنچ جائیں گے اور اس کے ساتھ ہی آئیں گے۔

غور طلب ہے کہ علی گڑھ کے رہنے والے مُنیش کمار گپتا کی اہلیہ نے ان سے گزارہ بھتہ کا مطالبہ کیا تھا۔ فیملی کورٹ نے ان کے حق میں فیصلہ سنایا تھا، جس کے بعد مُنیش نے حکم کو ہائی کورٹ میں چیلنج کیا۔ مُنیش نے یہ عرضی سی آر پی سی کی دفعہ 125 کے تحت پاس حکم کی لازمیت کو چیلنج کرتے ہوئے داخل کی۔ اس دفعہ کے تحت عدالت کو گزارہ بھتہ کے لیے وافر رقم متعین کرنے کا اختیار ہے۔

بیوی کا شوہر سے گزارہ بھتہ کے مطالبہ کا یہ معاملہ اپنے آپ میں کافی چونکانے والا ہے کیونکہ عام طور پر اس طرح کے معاملے عدالت میں نہیں آتے ہیں، وہ بھی عمر کی اس دہلیز پر اس طرح کے مطالبے شاید ہی سننے کو ملے ہوں۔