مغربی بنگال: سیلاب زدہ علاقوں میں پھنسے لوگوں کو محفوظ مقامات پر پہنچایا گیا

مغربی بنگال میں سیلاب زدہ علاقوں سے لوگوں کو بچا کر محفوظ مقامات پر بنائے گئے کیمپوں میں پہنچا دیا گیا ہے۔ کھڑگ پور، مغربی میدنی پور میں ضلع انتظامیہ کی ٹیم کے علاوہ دیگر ٹیمیں سیلاب کی حالت پر نظر رکھ رہی ہیں اور سیلاب زدہ علاقوں میں راحت اشیاء کی سپلائی کی جا رہی ہے۔ حالانکہ سیلاب سے متاثر لوگوں کا کہنا ہے کہ انہیں تاریکی میں رات گزارنی پڑ رہی ہے۔

اطلاع کے مطابق تقریباً 6000 لوگوں کو راحت کیمپوں میں لایا گیا ہے جبکہ زیادہ تر لوگ اپنے مویشیوں اور سامانوں کی وجہ سے سیلاب زدہ علاقوں میں اب بھی رہنے پر مجبورہیں۔ یہاں پر انہیں پینے کے لیے پانی اور کھانا نہیں مل رہا ہے جس کے سبب انہیں سخت پریشانی کا سامنا ہے۔

سیلاب کی وجہ سے متاثرہ علاقوں کا بجلی کنکشن کاٹ دیا گیا ہے۔ اس سے 80 ہزار لوگ بُری طرح متاثر ہوئے ہیں۔ وہیں ڈھائی لاکھ سے زیادہ کسانوں کی کھیتی کو بھی نقصان پہنچا ہے۔ قریب ایک لاکھ ہیکٹئر فصل برباد ہوئی ہے۔ سیلاب سے نپٹنے کے لیے این ڈی آر ایف کی دو ٹیمیں، ایس ڈی آر ایف کی چار ٹیمیں تعینات کی گئی ہیں۔

موقع پر موجود افسران نے بتایا کہ کچھ دن پہلے کی حالت بہت خراب تھی۔ یہاں کی ندیوں میں آبی سطح خطرے کے نشان سے اوپر پہنچ گیا تھا۔ گرام پنچایتوں میں بھی سیلاب کا منظر تھا۔ دوسری طرف ضلع چیف ہیلتھ آفیسر ڈاکٹر سومیہ شنکر سارنگی نے جانکاری دی کہ 15 لوگوں کو سانپ نے کاٹ لیا تھا۔ ان سبھی کا علاج کیا جا رہا ہے۔

وزیر اعلیٰ ممتا بنرجی نے بھی سیلاب متاثرہ علاقوں کا دورہ کیا ہے۔ ان کی ہدایت پر حاملہ خواتین، بزرگ اور بچوں کو ریسکیو کرکے محفوظ مقامات پر منتقل کر دیا گیا ہے۔ کچھ جگہوں پر حاملہ خواتین کی ڈیلیوری بھی ہوئی ہے۔ سبھی محفوظ ہیں۔ لوگوں تک ریلیف میٹیریل پہنچایا جا رہا ہے۔

غور طلب رہے کہ ممتا بنرجی نے حال ہی میں ایک سوشل میڈیا پوسٹ کیا تھا جس میں انہوں نے کہا تھا "میں نے ہگلی میں پُرشورا، گوگھاٹ-آرام باغ علاقہ اور مغربی میدنی پور میں گھاٹل کا دورہ کیا۔ ساتھ ہی میں بیرم بھوم کے سیلاب زدہ علاقوں میں انتظامیہ سے مسلسل رابطے میں ہوں۔ اس سلسلے میں پاشکورا، رتولیا کے سیلاب زدہ علاقوں کا دورہ کیا۔ وہاں کے مقامی لوگوں سے بات کی اور انہیں یقین دہانی کرائی۔ ضلع انتظامیہ ان کے ساتھ دن رات لگی ہوئی ہے۔ جن لوگوں کی فصل برباد ہوئی ہے انہیں فصل بیمہ دیا جائے گا"۔