بی جے پی کے ’بنگال بند‘ میں تشدد، بسوں میں توڑ پھوڑ، ٹرینیں روکیں

مغربی بنگال میں گزشتہ ہفتہ ہوئی فائرنگ کے دوران کچھ طلبا کی موت کی مخالفت میں بی جے پی نے 12 گھنٹہ کا بند بلایا ہے۔ بند کے دوران بی جے پی کارکنان مشتعل ہیں اور مظاہرہ کر رہے ہیں۔ بردوان ضلع کے نادن گھاٹ علاقہ میں بی جے پی کارکنان نے ٹرین روک دی ہے۔ اس دوران کئی مقامات پر گاڑیوں میں توڑ پھوڑ کی گئی ہے۔ بند کو دیکھتے ہوئے صوبہ بھر میں حفاظت کے پختہ انتظامات کئے گئے ہیں۔

کوچھ وہار میں بند حامیوں نے سرکاری بسوں کو توڑ دیا۔ کئی مقامات پر ٹرینیں روک دی گئی ہیں اور سرکاری بسوں کو نذر آتش کر دیا گیا ہے۔ مدنا پور میں بھی سرکاری بس کو نذر آتش کیا گیا ہے۔

ایک جانب جہاں بی جے پی نے بند بلایا ہے تو دوسری جانب اس کی مخالفت میں ٹی ایم سی حامی آسنسول میں بائیک ریلی نکال رہے ہیں۔

واضح رہے کہ شمالی دناجپور ضلع میں اسلام پور کے داری بھیت گاؤں میں آئی ٹی آئی کے طالب علم راجیش سرکار اور تپس برمن کی موت ہو گئی تھی جس کے بعد بی جے پی کی طرف سے بند کا اعلان کیا گیا ہے۔