’سکھ فار جسٹس‘ کے خلاف مرکز کی سخت کارروائی، ویب سائٹ، ایپ اور سوشل میڈیا اکاؤنٹ بلاک

پنجاب اسمبلی انتخاب 2022 کے ختم ہونے کے بعد مرکزی حکومت نے سکھ فار جسٹس (ایس ایف جے) کی منفی سرگرمیوں کو روکنے کے لیے سخت کارروائی کی ہے۔ وزارت برائے اطلاعات و نشریات نے بیرون ممالک پر مبنی ’پنجاب پالیٹکس ٹی وی‘ کی ایپ، ویب سائٹ اور سوشل میڈیا اکاؤنٹ کو بلاک کر دیا ہے۔

پنجاب میں اسمبلی انتخاب کے دوران مبینہ طور پر عوامی نظام بگاڑنے کے لیے ایک آن لائن اسٹیج کا استعمال کرنے کی کوشش کے سلسلے میں منگل کو مرکزی حکومت نے ’پنجاب پالیٹکس ٹی وی‘ کے ایپ اور سوشل میڈیا اکاؤنٹس کے ساتھ ساتھ ویب سائٹ پر بھی پابندی عائد کر دی۔ یہ پابندی تنظیم ایس ایف جے سے منسلک ہے۔

ایس ایف جے کو غیر قانونی سرگرمی (روک تھام) ایکٹ 1967 (یو اے پی اے) کے تحت غیر قانونی قرار دیا گیا ہے۔ وزارت برائے اطلاعات و نشریات نے ایک بیان میں کہا کہ ’’ریاستی اسمبلی انتخاب کے دوران عوامی نظام بگاڑنے کے لیے چینل کے ذریعہ آن لائن میڈیا کا استعمال کرنے کی خفیہ جانکاری کی بنیاد پر وزارت نے 18 فروری کو آئی ٹی ایکٹ کے تحت ایمرجنسی قوتوں کا استعمال کرتے ہوئے ’پنجاب پالیٹکس ٹی وی‘ کے ڈیجیٹل میڈیا اسٹیج پر روک لگا دی۔‘‘

حکومت ہند کی وزارت برائے اطلاعات و نشریات نے اپنے بیان میں یہ بھی کہا کہ ’’یہ اخذ کیا گیا کہ چل رہے انتخاب کے دوران نئے ایپ جاری کیے گئے اور نئے سوشل میڈیا اکاؤنٹ بنائے گئے۔ حکومت ہند ہندوستان میں مجموعی اطلاعات ماحول کو محفوظ رکھنے کے لیے محتاط اور پرعزم ہے اور ہندوستان کی یکجہتی و سالمیت کو کمزور کرنے کی صلاحیت والے کسی بھی عمل کو ناکام کرنے کے لیے پرعزم ہے۔‘‘