موسم کا حال: کشمیر میں برف باری اور جنوبی ریاستوں میں بارش، دہلی میں آلودگی برقرار

نئی دہلی: ملک کے بالائی علاقوں میں آج بارش اور ہلکی برفباری کا امکان ہے جبکہ زیریں علاقوں میں بھی بارش کا سلسلہ جاری رہے گا۔ تاہم میدانی علاقوں کے موسم میں کسی خاص تبدیلی کی توقع نہیں ہے۔ دراصل آج یعنی 23 نومبر کو ایک کمزور ویسٹرن ڈسٹربنس آنے والا ہے۔ اس کا زیادہ تر اثر صرف وسطی اور بالائی علاقوں تک ہی محدود رہے گا جس کی وجہ سے برف باری کا امکان ہے۔

تازہ ترین ویسٹرن ڈسٹربنس قدر کمزور قرار دیا جا رہا ہے اور توقع ہے کہ یہ کچھ وقت کے لیے کمزور حالت میں ہی رہے گا۔ تاہم اس کا زیادہ تر اثر صرف وسطی اور بالائی علاقوں تک ہی محدود رہے گا۔ اس کی وجہ سے مغربی ہمالیائی پہاڑیوں کے بالائی علاقوں میں ہلکی بارش اور برف باری کا بھی امکان ہے۔

راجدھانی دہلی کے موسم میں ان دنوں کوئی خاص تبدیلی نہیں آئی ہے۔ تاہم، یہاں کی ہوا خراب ہوتی جا رہی ہے۔ موسم کی پیش گوئی کرنے والی ایجنسی اسکائی میٹ کے مطابق دہلی والوں کو اس ہفتے آلودگی سے راحت ملنے کی امید نہیں ہے۔ درجہ حرارت کی بات کریں تو دہلی میں آج کم سے کم درجہ حرارت 10 ڈگری سیلسیس اور زیادہ سے زیادہ 26 ڈگری سیلسیس ہو سکتا ہے۔ اس کے ساتھ ہی دہلی میں دھند بڑھ سکتی ہے۔

اتر پردیش کی راجدھانی لکھنؤ میں صبح کے وقت دھند موجود رہے گی، جبکہ بعد میں مطلع عام طور پر صاف رہے گا۔ کم سے کم درجہ حرارت 14 ڈگری سیلسیس اور زیادہ سے زیادہ درجہ حرارت 28 ڈگری سیلسیس رہنے کی توقع ہے۔ نوئیڈا کی بات کریں تو یہاں بھی صبح کے وقت دھند چھائی رہے گی۔ یہاں کم سے کم درجہ حرارت 14 اور زیادہ سے زیادہ 26 ڈگری سیلسیس ہو سکتا ہے۔ تاہم یہاں کی ہوا میں آلودگی بڑھ سکتی ہے۔

اسکائی میٹ کے مطابق آج تمل ناڈو اور کیرالہ میں کچھ مقامات پر ہلکی سے درمیانی بارش کے ساتھ موسلادھار بارش کا امکان ہے۔ لکشدیپ اور جنوبی کرناٹک میں ہلکی سے درمیانی بارش ہو سکتی ہے۔ ساحلی آندھرا پردیش، ساحلی اڈیشہ اور جنوبی چھتیس گڑھ میں ہلکی بارش کا امکان ہے۔ جنوبی کونکن اور گوا کے ساتھ ساتھ جنوبی مدھیہ مہاراشٹر میں ہلکی بارش کا امکان ہے۔ اس کے ساتھ ہی مغربی ہمالیہ پر ہلکی بارش کا امکان ہے۔