رام رحیم کو مل رہا ’وی آئی پی ٹریٹمنٹ‘

نئی دہلی: دو سادھویوں کی عصمت دری کے معاملے میں پنچکولہ کی خصوصی سی بی آئی عدالت کے ذریعہ قصوروار قرار دیے گئے ڈیرا سچا سودا کے سربراہ گرمیت رام رحیم کو روہتک جیل بھیج دیا گیا ہے۔ اس سے پہلے انھیں گیسٹ ہاﺅس میں رکھا گیا تھا۔ ذرائع سے موصول ہونے والی اطلاعات کے مطابق رام رحیم کو اسپیشل سیل میں رکھا گیا ہے۔ حیرانی کی بات تو یہ ہے کہ ان کے ساتھ ’وی آئی پی ٹریٹمنٹ‘ کیا جا رہا ہے۔ انھیں پینے کے لیے منرل واٹر دیا جا رہا ہے اور ایک معاون بھی دیا گیا ہے۔ اتنا ہی نہیں، رام رحیم کو ان کی مرضی کے مطابق کپڑے پہننے کی اجازت بھی دی گئی ہے جب کہ ضابطہ کے مطابق جیل میں قیدیوں کو وہاں کے کپڑے پہننے ہوتے ہیں۔

عصمت دری کے معاملے میں قصوروار شخص کو ریاستی حکومت اور جیل انتظامیہ کے ذریعہ اس طرح کی چھوٹ دیے جانے اور وی آئی پی ٹریٹمنٹ سے کئی طرح کے سوال اٹھ رہے ہیں۔ لوگ اس لیے بھی حیران ہیں کہ جس رام رحیم کی وجہ سے چار ریاستوں کی معمولات زندگی درہم برہم ہو گئی ہے اور کروڑوں کا مالی نقصان ہو گیا ہے، اس شخص کو اس طرح کی آسانی اور آزادی کیوں دی جا رہی ہے۔