میڈل لوٹانے جا رہی تھیں ونیش پھوگاٹ، پولیس نے روکا تو راستہ میں رکھ کر چھوڑ دیا ارجن ایوارڈ

ایشین گیمز اور کامن ویلتھ گیمز میں طلائی تمغہ جیتنے والی خاتون پہلوان ونیش پھوگاٹ نے خاتون پہلوانوں کے ساتھ ہو رہے غلط سلوک کے خلاف ایوارڈ واپس کرنے کا اعلان گزشتہ دنوں کیا تھا، آج اس سلسلے میں انھوں نے قدم بھی اٹھا دیا۔ انھوں نے 30 دسمبر کو اپنا ایوارڈ دہلی میں ’کرتویہ پتھ‘ کے باہر رکھ کر چھوڑ دیا۔

دراصل ونیش پھوگاٹ اپنا ارجن ایوارڈ لوٹانے وزیر اعظم دفتر (پی ایم او) جا رہی تھیں۔ راستے میں انھیں پولیس نے روک دیا۔ جب ونیش پھوگاٹ نے دیکھا کہ انھیں پی ایم او جانے کی اجازت نہیں مل رہی ہے، تو انھوں نے اپنا ایوارڈ ’کرتویہ پتھ‘ پر رکھ کر چھوڑ دیا۔ ٹھیک اسی طرح جس طرح کچھ دنوں پہلے بجرنگ پونیا نے اپنا پدم شری ایوارڈ پی ایم او کے راستے میں فٹ پاتھ پر رکھ کر چھوڑ دیا تھا۔

اس واقعہ کو یوتھ کانگریس نے ملک کے لیے شرمسار کرنے والا دن قرار دیا ہے۔ یوتھ کانگریس نے اپنے سوشل میڈیا اکاؤنٹ پر لکھا ہے کہ ’’ملک کے لیے شرم کا دن۔ پہلوان بجرنگ پونیا کے بعد اب ملک کو میڈل دلانے والی بیٹی ونیش پھوگاٹ نے اپنا کھیل رتن اور ارجن ایوارڈ وزیر اعظم دفتر کے باہر رکھ دیا ہے۔ پی ایم مودی اور ان کی حکومت نے انھیں اس قدر پریشان کیا کہ آج یہ قدم اٹھانے کو مجبور ہیں۔‘‘

واضح رہے کہ اس سے قبل ڈبلیو ایف آئی (ریسلنگ فیڈریشن آف انڈیا) کو لے کر جاری تنازعہ کے درمیان ونیش پھوگاٹ نے وزیر اعظم نریندر مودی کو ایک کھلا خط لکھا تھا جس میں انھوں نے پورے واقعہ اور ڈبلیو ایف آئی کے نئے چیف سنجے سنگھ کے انتخاب پر مایوسی ظاہر کی تھی۔ ونیش پھوگاٹ نے خط میں خاتون پہلوانوں کو انصاف نہیں ملنے پر افسوس ظاہر کرتے ہوئے کہا تھا کہ وہ اپنا ارجن ایوارڈ اور کھیل رتن ایوارڈ لوٹا دیں گی۔