ٹوئن ٹاور معاملے میں وجلنس کی ٹیم نے شروع کی جانچ

اتر پردیش کے نوئیڈا میں سپرٹیک ٹوئن ٹاور کو گرائے جانے کے بعد اب لکھنؤ وجلنس سرگرم ہو گیا ہے۔ ٹوئن ٹاور معاملے میں لکھنؤ وجلنس ٹیم نے نوئیڈا اتھارٹی پہنچ کر معاملے کی جانکاری لی اور کئی ریکارڈ کا مطالبہ کیا ہے۔ سپریم کورٹ کے حکم پر گزشتہ 28 جولائی کو سپرٹیک ٹوئن ٹاور کو دھماکہ سے گرا دیا گیا تھا۔

وجلنس ٹیم نے آج نوئیڈا اتھارٹی دفتر پہنچ کر محکمہ پلاننگ سے کچھ جانکاریوں کے ساتھ چار نقشے مانگے ہیں۔ ٹیم نے ٹوئن ٹاور اور ایمرالڈ کورٹ کے لے آؤٹ سے جڑے یہ چار نقشے طلب کیے ہیں۔ نقشوں سے جڑی جانکاری دینے کے لیے اتھارٹی نے دو دن کا وقت طلب کیا ہے۔

وجلنس نے تقریباً گیارہ ماہ پہلے اتھارٹی کی شکایت کے بعد معاملہ درج کیا تھا۔ ایف آئی آر ایس آئی ٹی کی جانچ رپورٹ کی بنیاد پر 4 اکتوبر 2021 کو کرائی گئی تھی۔ ایف آئی آر میں 24 افسران کے علاوہ بلڈر کے 4 عہدیدار ملزم بنائے گئے تھے۔ افسران میں اتھارٹی کے اس وقت کے چیف ایگزیکٹیو افسر موہندر سنگھ کا بھی نام ملزمین میں تھا۔ ایس کے دویدی، او ایس ڈی یشپال سمیت دیگر افسران کا بھی اس میں نام تھا۔ ایف آئی آر درج ہونے کے بعد سے ابھی تک کوئی کارروائی شروع نہیں کی گئی تھی، اور نہ ہی کسی سے پوچھ تاچھ کی گئی تھی۔