مرکزی وزیر نریندر تومر کے بیٹے کی ویڈیو وائرل، کروڑوں روپے لین دین کی ہو رہی بات

مرکزی وزیر نریندر سنگھ تومر کے بیٹے دیویندر تومر کی وائرل ہوئی ویڈیو کو لے کر کانگریس حملہ آور ہے اور پارٹی کی قومی ترجمان سپریا شرینیت نے اس پورے معاملے کو سپریم کورٹ کے ریٹائرڈ جج سے جیوڈیشیل انکوائری کرانے اور دیویندر کو گرفتار کیے جانے کا مطالبہ کیا ہے۔

مرکزی وزیر تومر کے بیٹے کی سامنے آئی مبینہ ویڈیو کو لے کر شرینیت نے مدھیہ پردیش کی راجدھانی بھوپال کے کانگریس دفتر میں نامہ نگاروں سے گفتگو کرتے ہوئے کہا کہ وائرل ہو رہی ویڈیو میں دیویندر لکھنؤ کے ایک بچولیے کے ذریعہ مائننگ کاروباریوں سے کروڑوں روپے لینے کے لیے کئی بینک اکاؤنٹس کے بندوبست کی بات کرتے ہوئے سنے جا سکتے ہیں۔ ایک بچولیا ان سے الگ الگ بینک اکاؤنٹس کی تفصیل بھی مطالبہ کرتے ہوئے دکھائی دے رہا ہے۔ یاد رہے کہ نریندر سنگھ تومر 2014 سے 2019 کے درمیان مرکزی وزیر برائے اسپات و کانکنی رہ چکے ہیں۔ وہ مرینا کی دمنی سیٹ سے بی جے پی امیدوار ہیں۔

سپریا شرینیت نے مزید کہا کہ وائرل ویڈیو میں تیاگی کنیت والے آر بی آئی ریٹائرڈ کمشنر کے ذریعہ سے کسی پارٹی کے 100 کروڑ روپے دینے کو تیار ہونے کی بات ہو رہی ہے۔ کسی ہرپریت گل اور ڈی ایچ ایل نام کی فرم کے مالک سے پیسے لینے کی بات بھی ہے۔ بچولیا دیویندر کو کبھی گروجی، کبھی بھیا کہہ کر خطاب کر رہا ہے۔ روہت بھیا نام کے کسی شخص کو پیسے بھیجنے کی بات آتی ہے۔ راجستھان-پنجاب کی ایک پارٹی جسے ٹریڈنگ فرم اور مائننگ کاروباری بتایا گیا ہے، اس سے 39 کروڑ کا معاہدہ ہو رہا ہے، جس میں 18 کروڑ روپے پہلے آ جانے اور بعد میں 21 کروڑ روپے مزید دینے کی بات ہو رہی ہے۔ باتوں سے ایسا معلوم پڑتا ہے کہ یہ پیسہ موہالی کے کسی زمین کاروباری کے ذریعہ سے آئے گا۔

شرینیت کا الزام ہے کہ اس وائرل ویڈیو میں بچولیا کسی پارسل کا بھی ذکر کر رہا ہے، جسے دہلی ایئرپورٹ پر دیویندر تومر کی بیوی کے نام پہنچایا گیا۔ اس میں دہلی کے کرشنا مینن مارگ کا پتہ اور پاسپورٹ کی جانکاری مانگے جانے کی بات ہوتی ہے۔ آخر یہ کون سے پیسے ہیں، کس سے لینے ہیں، کیوں لینے ہیں، ان پیسوں کا کیا ہوگا؟ ایک بات تو صاف ہے کہ یہ پیسہ مدھیہ پردیش کی عوام کا ہے، یہاں کے کسانوں کا ہے، بے روزگار نوجوانوں کا ہے، یہاں کی خواتین کا وہ حق ہے، جسے لوٹ کر تومر اور ان کے کنبہ والے غالباً اپنی تجوریاں بھر رہے ہیں۔

وزیر اعظم نریندر مودی پر طنز کستے ہوئے شرینیت نے کہا کہ مودی جی کو ای ڈی-ای ڈی کھیلنے کا بڑا شوق ہے، لیکن یہاں سینکڑوں کروڑوں روپے کی رشوت کی بات ہوتی نظر آ رہی ہے۔ یہاں سی بی آئی، ای ڈی اور انکم ٹیکس کو مانو سانپ سونگھ گیا ہو۔ لیکن انتخاب کے دوران ایسا ویڈیو اور بھی بڑا اندیشہ پیدا کرتا ہے۔ یہ بلیک منی کہاں لگایا گیا ہے۔ انتخابی کمیشن کو اس ویڈیو کا نوٹس لے کر اس کی سچائی پتہ کر فوراً کارروائی کرنی چاہیے۔

کانگریس ترجمان سپریا شرینیت نے کہا کہ آج سوال یہ ہے کہ اس بدعنوانی کے تار کہاں تک جڑے ہیں؟ ایک تنہا لڑکا مدھیہ پردیش میں اتنا بڑا گورکھ دھندا تو نہیں چل سکتا۔ تو اس میں کہاں تک ریاست کے وزیر اعلیٰ شیوراج سنگھ چوہان شامل ہیں؟ کس کس مرکزی وزیر کی سانٹھ گانٹھ ہے؟ یہ کھیل اپریل سے کھلے طور پر چل رہا ہے اور ریاستی حکومت اور وزیر اعظم نریندر مودی آنکھوں پر پٹی باندھ کر انجان بنے ہوئے ہیں۔