جیل میں قیدیوں کے ذریعہ راوَن کا پُتلا نذرِ آتش کرنے کی ویڈیو وائرل، 4 افسران معطل

گوا کی کولولے سنٹرل جیل کے چار افسران کو ڈیوٹی میں لاپروائی کا مظاہرہ کرنے کے الزام میں معطل کر دیا گیا ہے۔ یہ کارروائی سوشل میڈیا پر ایک ویڈیو سامنے آنے کے بعد ہوئی ہے جس میں جیل کے قیدی راوَن کا پُتلا جلاتے ہوئے نظر آ رہے ہیں۔ جیل انسپکٹر جنرل اوم ویر سنگھ نے جمعہ کے روز اس تعلق سے 4 جیل افسروں کو معطل کرنے کا حکم جاری کیا۔ جن جیل افسران کو سزا دی گئی ہے ان کے نام چندرکانت ہریجن (اسسٹنٹ سپرنٹنڈنٹ)، مہیش پھڑتے (جیلر)، انل گاؤنکر (جیلر) اور رامناتھ گوڈے (اسسٹنٹ جیلر) ہیں۔

ذرائع کا کہنا ہے کہ سوشل میڈیا پر دسہرہ سے قبل کی شام قیدیوں کے ذریعہ پٹاخوں کا استعمال کر راوَن دَہن کرنے کی ویڈیو سامنے آئی تھی جس کے بعد جیل افسران کے خلاف یہ کارروائی کی گئی ہے۔ اس بارے میں ایک افسر کے مطابق معطلی کے حکم میں کہا گیا ہے کہ جیل افسران کو جواب دینا ہوگا کہ بغیر اجازت لیے قیدیوں کو پُتلا نذر آتش کرنے کا موقع کس طرح فراہم کیا گیا۔ اس بات کی بھی جانچ کی جائے گی کہ جیل احاطہ میں موبائل فون لے جانے کی اجازت کس طرح دی گئی۔ جیل اہلکاروں کی معطلی سے متعلق حکم میں یہ بھی کہا گیا ہے کہ واقعہ ظاہر کرتا ہے کہ جیل کی سیکورٹی کا کیا حال ہے۔

افسر کا کہنا ہے کہ جیل افسران کو اس پورے معاملے کے لیے بنیادی طور پر ذمہ دار ٹھہرایا گیا ہے۔ اب انھیں پورے معاملے کی جانچ ہونے تک کے لیے معطل کر دیا گیا ہے۔