ویڈیو: امت شاہ کی ریلی میں میدان تو دور، اسٹیج کے پاس رکھی کرسیاں رہیں خالی

یہ تصویر جو آپ دیکھ رہے ہیں اسے بی جے پی کے قومی صدر امت شاہ نے اپنے سرکاری ٹوئٹر ہینڈل پر شیئر کی ہیں، اسٹیج کے پیچھے سے لی گئی اس تصویر میں خوب بھیڑ بھاڑ نظر آ رہی ہے، تصویر میں صاف دیکھا جا سکتا ہے کہ امت شاہ تقریر کر رہے ہیں اور میدان میں لوگوں کے درمیان جہاں-تہاں بی جے پی کے ایک ادھ جھنڈے بھی نظر آ رہے ہیں۔

لیکن یہ تصویر کا ایک پہلو ہے، تصویر کا دوسرا پہلو دیکھیے ذیل کے ویڈیو میں، یہ ویڈیو اس وقت ریکارڈ کی گئی جس وقت امت شاہ تقریر کر رہے تھے، تصویر میں صاف نظر آ رہا ہے کہ صرف اسٹیج کے سامنے بھیڑ ہے، مگر پیچھے کی تمام کرسیاں خالی پڑی ہیں۔

یہ ویڈیو صحافی ابھیسار شرما نے اپنے ٹوئٹر پر شیئر کیا ہے، جس کی تصدیق قومی آواز نہیں کرتا، لیکن پہلی نظر میں یہ ویڈیو ایڈیٹ کردہ نہیں لگتا، اس میں وہیں اسٹیج ہے، امت شاہ کی تقریر ہو رہی ہے، اس ویڈیو کو شیئر کرتے ہوئے ابھیسار شرما نے طنز کرتے ہوئے لکھا ہے، "اب امت شاہ خطاب کر رہے ہیں، جوش دیکھیے، میدان میں زبردست بھیڑ، ہلا دے گی"۔

ویسے بتا دیں کہ آگرہ کے کالج میدان میں بی جے پی کی 'وجے سنکلپ سبھا' میں امت شاہ قریب دو گھنٹے کی تاخیر سے پہنچے تھے، انتخابات میں سمجھا جاتا ہے کہ کسی بڑے لیڈر کی ریلی میں رہنما کی آمد میں تاخیر سے بھیڑ اور بڑھتی ہے، اور اسی سے اس رہنما اور اس پارٹی کی مقبولیت کا اندازہ لگایا جاتا ہے، لیکن امت شاہ کے دو گھنٹے تاخیر سے پہنچنے کے باوجود بھی میدان تو دور، کرسیاں تک خالی رہ جانا بی جے پی کے لئے خطرے کی گھنٹی ثابت ہو سکتا ہے۔