مہاراشٹر کے ودربھ علاقے میں شدید بارش کے پیش نظر ریڈ الرٹ، گجرات میں بھی آسمان سے ابھی راحت نہیں

ملک کی کئی ریاستوں میں اس وقت مانسون کی تیز بارش کا سلسلہ جاری ہے۔ اس سے کہیں زبردست جانی و مالی نقصان کا سامنا ہے تو کہیں لوگوں نے شدید گرمی سے راحت لی ہے۔ اس درمیان محکمہ موسمیات نے 2 ستمبر کو بھی مہاراشٹر کے ودربھ علاقے میں الگ الگ جگہوں پر شدید بارش ہونے کا امکان ظاہر کیا ہے جس کے تحت 12 سینٹی میٹر سے لے کر 20 سینٹی میٹر تک بارش ہو سکتی ہے۔ اس کے پیش نظر ودربھ میں ریڈ الرٹ جاری کیا گیا ہے۔ آئی ایم ڈی نے گجرات، مراٹھواڑہ، مغربی مدھیہ پردیش، آسام اور میگھالیہ میں بھی الگ الگ مقامات پر تیز بارش کی پیش گوئی کرتے ہوئے آرینج الرٹ جاری کیا ہے۔

اتراکھنڈ، مشرقی راجستھان، مشرقی مدھیہ پردیش، انڈمان اور نکوبار جزائر، اروناچل پردیش، ناگالینڈ، منی پور، میزورم، تریپورہ، سوراشٹر اور کچھہ، وسط مہاراشٹر، تلنگانہ، ساحلی کرناٹک، شمالی کرناٹک، کیرل اور ماہے میں بھی 7 سینٹی میٹر تک بارش ہونے کا امکان ہے۔ راجدھانی دہلی اور این سی آر میں آسمان پر بادل چھائے رہیں گے اور ہلکی بارش بھی ہو سکتی ہے۔ حالانکہ محکمہ موسمیات نے اترپردیش اور بہار میں موسم کے صاف رہنے کی امید ظاہر کی ہے۔

جنوبی ہند کی ریاست تلنگانہ کی بات کی جائے تو یہاں الگ الگ جگہوں پر آسمانی بجلی گرنے کے ساتھ 40 سے 50 کیلومیٹر فی گھنٹے کی رفتار سے تیز ہوائیں چلنے اور آواز کے ساتھ بارش ہونے کا امکان ہے۔ جھارکھنڈ، گجرات، کونکن، گوا اور ساحلی آندھرا پردیش اور ینم، اروناچل پردیش، آسام اور میگھالیہ، ناگالینڈ، منی پور، میزورم اور تریپورہ، مدھیہ پردیش، ودربھ اور چھتیس گڑھ میں مختلف مقامات پر آسمانی بجلی گرنے کا خدشہ ظاہر کیا گیا ہے جس کی وجہ سے محکمہ موسمیات نے لوگوں کو احتیاط برتنے کی ہدایت دی ہے۔