نوٹ بندی کے شکار عوام کریں گے کمل کے پھول کی ’ووٹ بندی‘: لالو یادو

پٹنہ: راشٹریہ جنتا دل (آر جے ڈی) کے صدر لالو پرساد یادو نے نوٹ بندی اور روزگار کے معاملے پر اشاروں میں وزیر اعظم نریندر مودی کو ہدف تنقید بنایا۔

لالو یادو کے ٹوئٹر ہینڈل سے آج کیے گئے ٹوئٹ میں کہا گیا ہے کہ ’’انہوں نے نوٹ بندی ہی نہیں، روزگار بندی بھی کی ہے اور نوجوانوں کی سوچ بندی بھی۔ اب عوام کریں گے کمل کے پھول کی ووٹ بندی‘‘۔

آر جے ڈی کے سربراہ نے اس سے قبل ایک دیگر ٹوئٹ میں وزیر اعلی نتیش کمار کو نشانہ بناتے ہوئے کہا تھا کہ ’’نتیش کہتے ہیں کہ اب لالٹین کی ضرورت نہیں ہے لیکن وہ یہ نہیں جانتے کہ بجلی جانے پر تو لالٹین جلانی پڑتی ہی ہے۔ اب کوئی نتیش کو سمجھائے ان کا نشان تیر تو ’دواپر یُگ‘ میں ہی ختم ہو گیا تھا اب ان کا وہ ’تيروا‘ کمل کے پھول کو چاک کرنے کے کام آ رہا ہے‘‘۔

قبل ازیں راشٹریہ جنتا دل کے ٹوئٹر ہینڈل سے نعرہ ’کرے کے با، لڑے کے با، جیتے کے با‘ پیش کیا گیا۔ لالو پرساد یادو نے بھی اسے ری ٹوئٹ کیا ہے۔ پارٹی کی طرف سے اس میں لکھا گیا، ’’انصاف کی اس جنگ میں جمہوریت کی خاطر، کرے کے با، لڑے کے با، جیتے کے با۔ ہر ناانصافی اور ظلم کے خلاف اس بار مل کر، کرے کے با، لڑے کے با، جیتے کے با۔‘‘

آر جے ڈی کی جانب سے جلد ہی اس نعرے پر مبنی گیت بھی لانچ کرنے کا اعلان کیا گیا ہے۔

واضح رہے کہ سرخیوں میں رہنے والے چارہ گھپلہ معاملے میں سزا پانے کے بعد آر جے ڈی سربراہ ان دنوں کافی بیمار ہیں۔ لالو یادو کا علاج رانچی کے راجندر انسٹیٹیوٹ (رمس) میں چل رہا ہے۔ لالو یادو کی غیر موجودگی میں ان کے خاندان کے افراد اور حامی ان کے ٹوئٹر ہینڈل کو چلا رہے ہیں۔

(یو این آئی ان پٹ کے ساتھ)