بہار میں بھیانک سڑک حادثہ، 9 بچوں کی موت 20 سے زائد زخمی

مظفر پور: بہار میں مظفر پور ضلع کے مینا پور پولس اسٹیشن علاقہ میں ایک بھیانک حادثہ پیش آیا ہے۔ یہاں کے ایک اسکول میں تیز رفتار گاڑی کے داخل ہو جانے کے سبب 9 بچوں کی موت اور 20 سے زائد بچے زخمی ہو گئے ہیں۔ یہ بچے پرائمری اسکول کے طلباء ہیں اور چھٹی ہونے کے بعد گھر جا رہے تھے۔
پولس سپرنٹنڈنٹ وویک کمار نے واقعہ کی تصدیق کرتے ہوئے بتایا کہ مینا پور پولس اسٹیشن علاقہ کے دھرمپور میں واقع پرائمری اسکول کے بچے چھٹی کے بعد گھر لوٹ رہے تھے اسی وقت ایک تیز رفتار بولیرو نے انہیں کچل دیا۔

اس حادثے میں 9 بچوں کی جائے حادثہ پر ہی موت ہونے کی اطلاع ہے۔ حادثہ میں بیس سے زائد بچے زخمی بھی ہو گئے ہیں۔ کمار نے بتایا کہ زخمیوں کو شری کرشن میڈیکل کالج وہسپتال میں داخل کرایا گیا ہے۔

بہار کے وزیر اعلیٰ نتیش کمار نے حادثہ پر تعزیت کا اظہار کرتے ہوئے ہر بچے کے لواحقین کے حق میں 4-4 لاکھ کا معاوضہ دینے کا اعلان کیا ہے۔