اتراکھنڈ: وزیر اعلیٰ تیرتھ سنگھ نے کووڈ کرفیو یکم جون تک بڑھانے کا کیا اعلان

دہرادون: اتراکھنڈ میں کووڈ- 19 انفیکشن کی روک تھام کے لئے ریاستی حکومت نے کووڈ کرفیو میں یکم جون تک توسیع کا فیصلہ کیا ہے۔ وزیر اعلی تیرتھ سنگھ راوت کی ہدایات کے بعد یہ فیصلہ کیا گیا ہے۔ حکومت کے ترجمان کابینہ وزیرسبودھ انیال نے پیر کے روز بتایا کہ ریاست میں کووڈ کرفیو میں یکم جون تک توسیع کردی گئی ہے۔ انہوں نے کہا کہ تاجروں کے مطالبے کے عین مطابق وزیر اعلی سے مشاورت کے بعد صبح سات بجے سے 10 بجے کے بجائے آٹھ بجے سے گیارہ بجے تک بازار کھولنے کا فیصلہ کیا گیا ہے۔

سبودھ انیال نے بتایا کہ جس میں حسب سابق اشیائے ضروری دودھ ، گوشت، مچھلی، پھل اور سبزیوں کی دکانیں کھولی جاسکیں گی۔ انہوں نے بتایا کہ راشن اور کریانے کی دوکانوں کے لئے عام لوگوں کو 28 مئی کی صبح 8 بجے سے دوپہر 12 بجے تک آمدورفت کے لئے چھوٹ رہے گی۔ حکومت کے ترجمان نے کہا کہ گزشتہ کئی دنوں سے کووڈ کا گراف کم ہوتا نظر آرہا ہے، لیکن حکومت اس کی روک تھام میں مصروف ہے۔