مہوبا: گمشدہ ’ای وی ایم کنٹرول یونٹ‘ کے لئے گھر گھر تلاشی، 15 گھنٹے بعد برآمد

مہوبا: اترپردیش کے ضلع مہوبا میں لوک سبھا انتخابات کے چوتھے مرحلے میں ووٹنگ کے بعد غائب ہوئے ایک ای وی ایم مشین کا کنٹرول یونٹ 15 گھنٹے کی سخت کھوج بین کے بعد برآمد کرلیا گیا۔ ای وی ایم مشین کا کنٹرولر مل جانے سے ضلع انتظامیہ نے راحت کی سانس لی ہے۔ ڈسٹرکٹ الکٹورل افسر نے معاملے میں لاپرواہی برتنے والی پولنگ پارٹی کے خلاف سخت کاروائی کی ہدایت دی ہے۔

ڈسٹرکٹ مجسٹریٹ سہدیو نے منگل کو یہاں بتایا کہ پنواڑی بلاک کے نوگاؤں پھدنا میں پولنگ سنٹر 92 کے پولنگ بوتھ 127 کی ای وی ایم کا گم شدہ کنٹرول یونٹ سخت کھوج بین کے بعد مسافر ویٹنگ روم کے سامنے لاوارث حالت میں ملا ہے۔

انہوں نے بتایا کہ کنٹرول سیلڈ پوری طرح سے محفوظ پائی گئی ہے۔ آئی ٹی ماہرین سے بھی اس کی جانچ کرالی گئی ہے۔ اس معاملے میں ضروری جانچ کی ہدایات دیئے گئے ہیں۔ ابتدائی جانچ میں پولنگ پارٹی کی لاپرواہی ثابت ہونے پر بوتھ کے صدر افسر کملیش کمار سمیت دیگر سبھی انتخابی اہلکار کے خلاف کارروائی کیے جانے کو کہا گیا ہے۔

قابل ذکر ہے کہ ضلع میں چوتھے مرحلے کے تحت اختتام پذیر ہوئی ووٹنگ کے بعد پولنگ پارٹی کی جانب سے دیر شام مہوبا پہنچ کر ریاستی پولی ٹیکنک کالج میں جب ای وی ایم مشن اور دیگر سامان جمع کرائے جا رہے تھے۔ اس وقت ایک اے وی ایم کا ڈاٹا سیو کرنے والا کنٹرول یونٹ غائب پائے جانے سے کھلبلی مچ گئی۔

معاملے کی اطلاع ملتے ہی پولس اور انتظامیہ کی ٹیموں کو فوری طور بوتھ پر بھیج کر گاؤں کے ایک ایک گھر میں تلاشی مہم چلا کر اس اہم کنٹرول یونٹ کو برآمد کر نے کی کوشش کی گئی، لیکن کامیابی نہیں ملی۔

ایڈیشنل پولس سپرنٹنڈنٹ ویریندر سنگھ نے بتایا کہ آج صبح ڈسٹرکٹ مجسٹریٹ سہدیو اور پولس سپرنٹنڈنٹ سوامی ناتھ کی قیادت میں پنواڑی علاقے میں ایک بار پھر سے ای وی ایم کنٹرولر کو تلاشنے کی مہم چلائی گئی۔ آس پاس کے گاؤں میں اس کی منادی بھی کرائی گئی۔ اور کنٹرولر کھوج کر لانے والے کو دس ہزار روپئے کا انعام دینے کا علان بھی کیا گیا۔

بلآخر مسافری ویٹنگ روم کے سامنے کنٹرولر کی برآمدگی نے اتنظامیہ کو راحت پہنچائی ہے۔ مانا جارہا ہے کہ پولنگ پارٹی کی لاپرواہی کی وجہ سے ای وی ایم کنٹرولر موقع پر چھوٹ گیا تھا۔