مانسون اجلاس شروع ہونے سے پہلے ہی اتر پردیش اسمبلی کے 20 ملازمین کورونا پازیٹو

اتر پردیش میں کورونا وائرس خوفناک شکل اختیار کرتا جا رہا ہے۔ کورونا نے یو پی اسمبلی کے اندر بھی دستک دے دی ہے۔ اسمبلی کا مانسون اجلاس شروع ہونے سے پہلے ہی اسمبلی کے 20 ملازمین کورونا پازیٹو پائے گئے ہیں۔ بتایا جا رہا ہے کہ مانسون اجلاس شروع ہونے سے پہلے اراکین اسمبلی سمیت تقریباً 600 دیگر اسمبلی ملازمین کا کورونا ٹیسٹ کرایا گیا تھا۔ اس ٹیسٹ کا ریزلٹ جب برآمد ہوا تو 20 کے پازیٹو ہونے کی تصدیق ہوئی۔ انفیکشن کے شکار ہونے والے ملازمین میں سیکورٹی گارڈ بھی شامل ہیں۔

قابل ذکر ہے کہ یو پی اسمبلی کا مانسون اجلاس 20 اگست سے شروع ہونا ہے۔ اجلاس سے پہلے سبھی اراکین اسمبلی اور اسمبلی کے سبھی ملازمین کا کورونا ٹیسٹ کرانے کے لیے کہا گیا تھا۔ مانسون اجلاس 3 دن کا ہوگا۔ اس سے قبل اسمبلی اسپیکر ہردے نارائن دیکشت نے بتایا تھا کہ کورونا انفیکشن سے بچاؤ کے لیے ضروری احتیاط کو لے کر وہ سبھی پارٹی لیڈران کے ساتھ میٹنگ کر چکے ہیں۔

اسمبلی اسپیکر نے کہا تھا کہ مانسون اجلاس کے دوران سینیٹائزیشن اور تھرمل اسکریننگ کے انتظام کیے جائیں گے۔ انھوں نے یہ بھی کہا تھا کہ اجلاس کے دوران سبھی سیاسی پارٹیوں نے تعاون کرنے کی بات کہی ہے۔ اسپیکر کو آج اسمبلی کے سیکورٹی انتظامات کا جائزہ لینا ہے۔ 19 اگست کو کل جماعتی میٹنگ ہوگی۔ اس میٹنگ میں وزیر اعلیٰ یوگی آدتیہ ناتھ بھی شامل ہوں گے۔

اسمبلی اسپیکر کے مطابق سوشل ڈسٹنسنگ کے ضابطوں پر عمل کرنے کے لیے ایوان میں اراکین اسمبلی کی سیٹ کے درمیان ایک سیٹ کا فاصلہ رکھا جائے گا۔ لابی ایریا اور ناظرین کی جگہ کا بھی استعمال اراکین اسمبلی کو بیٹھنے کے لیے کیا جائے گا۔ ضابطے کے مطابق 6 مہینے کے اندر اجلاس بلانا ضروری ہے، یہی وجہ ہے کہ 3 دن کا مانسون اجلاس مدعو کیا گیا ہے۔