اُرملا ماتونڈکر کانگریس میں شامل، موجودہ حالات پر کیا اظہارِ فکر

بالی ووڈ کی معروف اداکارہ اُرملا ماتونڈکر نے کانگریس صدر راہل گاندھی سے ملاقات کے بعد باضابطہ پارٹی کی رکنیت اختیار کر لی۔ راہل گاندھی نے پھولوں کا گلدستہ پیش کر کے ان کا استقبال کیا اور سیاسی میدان میں ان سے عوام کے حق میں مثبت قدم اٹھانے کی امید ظاہر کی۔ کانگریس کے میڈیا انچارج رندیپ سنگھ سرجے والا نے پارٹی ہیڈکوارٹر میں ارملا ماتونڈکر کے پارٹی میں شامل ہونے کا اعلان کیا۔ اس موقع پر ممبئی شمال مغربی لوک سبھا سیٹ سے کانگریس کے امیدوار سنجے نروپم اور ممبئی کانگریس کے صدر ملند دیوڑا بھی موجود تھے۔

اُرملا ماتونڈکر کے ساتھ کانگریس صدر راہل گاندھی کی ایک تصویر بھی پارٹی کے آفیشیل ٹوئٹر ہینڈل سے شیئر کی گئی ہے جس میں وہ پھولوں کا گلدستہ پیش کر کے بالی ووڈ اداکارہ کا پارٹی میں استقبال کرتے نظر آ رہے ہیں۔ کانگریس میں شمولیت اختیار کرنے کے بعد اُرملا نے میڈیا سے بات چیت کے دوران اپنے عزائم کا بھی اظہار کیا اور موجودہ حالات پر بھی اپنا نظریہ سامنے رکھا۔ انھوں نے کہا کہ ’’گلیمر نہیں بلکہ نظریاتی چیزوں کو سامنے رکھ کر میں نے کانگریس کی رکنیت اختیار کی۔ آج ملک میں جس طرح کا ماحول ہے، اسے بدلنے کی ضرورت ہے اور اس کے لیے کانگریس ایک بہتر پلیٹ فارم ہے۔‘‘

بالی ووڈ اداکارہ نے میڈیا سے بات چیت کے دوران یہ کہنے میں بھی پرہیز نہیں کیا کہ ’’آج اظہارِ رائے کی آزادی پر سوال کھڑے ہو گئے ہیں۔ بے روزگاری کافی بڑھ گئی ہے۔ اس طرح کے ایشوز پر کام کرنے کی ضرورت ہے۔‘‘ راہل گاندھی سے متعلق اپنا نظریہ پیش کرتے ہوئے انھوں نے کہا کہ ’’ملک کو ایک ایسے لیڈر کی ضرورت ہے جو سب کو ساتھ لے کر چلے، ایک ایسا لیڈر جو کسی طرح کی تفریق نہ کرے اور راہل گاندھی ایسے ہی لیڈر ہیں۔‘‘