کشمیر کے لیے ’شہرکاری‘ نقصاندہ، ماحولیات پر مضرات اثرات مرتب

سری نگر: ویلی سٹیزنز کونسل کے جنرل سکریٹری امدا ساقی نے عالمی یوم ماحولیات کے موقع پر کہا ہے کہ وادی کشمیر میں تیزی سے بڑھ رہی اربنائزیشن یا شہرکاری نے قدرتی موحولیات کو بگاڑ دیا ہے۔ انہوں نے اپنے ایک بیان میں کہا کہ کشمیر میں سرسبز و شاداب جنگلوں اور صاف ستھرے پانی کی وجہ سے ماحول صاف و شفاف اور پرسکون تھا لیکن افسوس کی بات ہے کہ وہ جدید معاشرے کی تشکیل کے نظریے کی نذر ہو رہا ہے۔

امدا ساقی بیان میں کہا کہ 'ہمارے سرسبز و شاداب جنگلات ہر گزرتے دن کے ساتھ غائب ہو رہے ہیں ان کے تحفظ کا کوئی خیال نہیں رکھا جا رہا ہے، حکومت ماحول کو بچانے کے تئیں ہمیشہ سے غیر سنجیدہ اپروچ روا رکھے ہوئے ہے ورنہ جنگل اسمگلروں کے خلاف سخت قوانین کے تحت مقدمے درج کیے گئے ہوتے'۔

موصوف جنرل سکریٹری نے کہا کہ ایل اے ڈبیلو ڈی اے (لاوڈا) کے غیر ذمہ دارانہ طریقہ کار کا ہی نتیجہ ہے کہ شہرہ آفاق جھیل ڈل، جھیل ولر اور دیگر آبی ذخائر خاموشی سے سکڑ رہے ہیں۔ انہوں نے انتظامیہ سے اپیل کی کہ وہ کشمیر کے آبی ذخائر کے تحفظ کے لئے ٹھوس اقدام کرے۔ ان کا کہنا تھا کہ کونسل کے رضا کار حکومت کے جنگلات کے تحفظ کے لئے تیار کی جانے والی کسی بھی پالیسی کو عملی جامہ پہنانے میں ہر ممکن تعاون کریں گے۔