اتراکھنڈ حکومت میں وزیر ریکھا آریہ کے محکمہ کی چٹھی پر ہنگامہ، کانگریس حملہ آور

اتراکھنڈ حکومت میں کابینہ وزیر ریکھا آریہ اکثر اپنے بیانات کی وجہ سے تنازعہ میں رہتی ہیں۔ اس بار ان کی کابینہ کے ذریعہ جاری کی گئی دو چٹھیوں نے تنازعہ پیدا کر دیا ہے۔ ایک چٹھی میں محکمہ کے ملازمین اور افسران سے آئندہ ماہ یوپی کے بریلی میں ہونے والے ایک مذہبی انعقاد میں حصہ لینے کی بات کہی گئی ہے۔ یہ تقریب کوئی اور نہیں بلکہ محکمہ کی وزیر ریکھا آریہ ہی کروا رہی ہیں۔

میڈیا رپورٹس کے مطابق یہ خط محکمہ فوڈ کے ایڈیشنل کمشنر پی ایس پانگتی نے جاری کیا ہے جس پر تنازعہ پیدا ہو گیا ہے۔ اس خط کے بعد اتراکھنڈ سپلائی ڈپارٹمنٹ کے افسران و ملازمین اگست کے پہلے ہفتہ میں بریلی میں ہونے والی مذہبی تقریب میں مصروف رہیں گے۔ بتایا جاتا ہے کہ ریکھا آریہ 4 سے 9 اگست تک بریلی میں 108 شیولنگوں کی ’پران پرتشٹھا‘ کروا رہی ہیں، جس میں آنے کے لیے محکمہ جاتی افسران و ملازمین کو مدعو کیا گیا ہے۔ اس انعقاد میں ریکھا آریہ کے حامیوں و رشتہ داروں کے علاوہ بڑی تعداد میں مقامی لوگ بھی بھنڈارا چکھنے کے لیے جمع ہوں گے۔

دوسرا خط محکمہ ترقی اطفال کی طرف سے لکھا گیا ہے جس میں سبھی افسران و ملازمین اور آنگن باڑی خاتون کارکنان کو جلابھشیک کرنے کی ہدایت دی گئی ہے۔ یہ تصویر سوشل میڈیا میں شیئر کرنے کی بھی ہدایت ہے۔ دونوں خطوط کے پیش نظر کانگریس نے بی جے پی اور وزیر ریکھا آریہ کو تنقید کا نشانہ بنایا ہے۔ کانگریس کے ریاستی صدر کرن ماہرا نے وزیر اعلیٰ کو باضابطہ ایک خط لکھ دیا ہے جس میں اس تعلق سے نوٹس لینے کا مطالبہ کیا گیا ہے۔ خط میں لکھا گیا ہے کہ ریاست میں مانسون کے سبب چھٹیاں رَد کی گئی ہیں اور دوسری طرف وزیر برائے خوراک کے ذاتی پروگرام کے لیے اتراکھنڈ سے باہر محکمہ کے افسران و ملازمین کو مدعو کیا جا رہا ہے۔ کرن ماہرا کا کہنا ہے کہ جس طرح کی زبان کا استعمال ریکھا آریہ کر رہی ہیں وہ کسی مجرمانہ روش والے شخص کے ذریعہ ہی کیا جا سکتا ہے۔

اس پورے معاملے پر وزیر خوراک ریکھا آریہ کا کہنا ہے کہ میں کسی کی کنپٹی پر بندوق رکھ کر دعوت نامہ نہیں بھیجا ہے۔ جس کو آنا ہے وہ اپنی مرضی سے آ سکتا ہے۔ حالانکہ انھوں نے یہ بھی کہا کہ وہ پتہ کریں گی کہ یہ خط کس سطح پر لکھا گیا ہے۔ بہرحال، ریکھا آریہ کی تقریب میں شامل ہونا ہے یا نہیں، اس تعلق سے محکمہ کے افسران پس و پیش میں ہیں۔ ان کی سمجھ میں نہیں آ رہا ہے کہ وہ جا کر ثواب کمائیں یا پھر خود کو کسی سیاسی تنازعہ میں پھنسنے سے بچائیں۔