ہنومان کی تصویر کے ساتھ خاتون باڈی بلڈر کی تصویر کھچوانے پر مدھیہ پردیش میں ہنگامہ

مدھیہ پردیش کانگریس کے سربراہ کمل ناتھ نے پارٹی کارکنان  سے کہا کہ وہ منگل کو ہولیکا دہن  سے پہلے 'ہنومان چالیسہ' پڑھیں۔ انہوں نے کہا ایسا اس لئے کریں کیونکہ بھارتیہ جنتا پارٹی کے زیر اہتمام ایک پروگرام میں بھگوان ہنومان کی "بے عزتی" کی گئی ہے۔ 4 اور 5 مارچ کو رتلام میں منعقدہ 13 ویں مسٹر جونیئر باڈی بلڈنگ مقابلے کے مقام پر خواتین باڈی بلڈرز نے بھگوان ہنومان کی تصویر کے ساتھ کھڑے ہو کر تصویر کھچوائی جس پر ہنگامہ برپا ہو گیا۔ اس ہنگامہ کے بعد کانگریس کے مقامی رہنماؤں نے  اس مقام پر گنگا جل چھڑکا اور ہنومان چالیسہ پڑھا۔

کانگریس رہنما کمل ناتھ نے کہا کہ سناتن دھرم کی روایت رہی ہے کہ ہولی کے دن ہولیکا دہن کے دوران تمام برائیوں کو جلا کر راکھ کر دیا جائے۔ "ہم نے حال ہی میں دیکھا کہ کس طرح رتلام میں بی جے پی کے پروگرام میں بھگوان بجرنگ بلی کی بے عزتی کی گئی۔ ہندو دھرم کی اس توہین سے میرا دل دکھی ہے۔ میں آپ سے گزارش کرتا ہوں کہ آج اپنے شہر اور گاؤں میں برائی کے پتلے جلائیں اور نیکی کو جگانے کے لئے ’ہنومان چالیسہ‘ کا ورد کریں۔ رات کو روایت کے مطابق ہولیکا دہن میں حصہ لیں۔‘‘

باڈی بلڈنگ پروگرام کے دعوتی کارڈ کے مطابق، آرگنائزنگ کمیٹی میں شہر کے بی جے پی میئر پرہلاد پٹیل شامل ہیں، جبکہ سرپرست قانون ساز چیتنیا کشیپ ہیں۔ اس تقریب کی ایک ویڈیو، جو سوشل میڈیا پر منظر عام پر ہے اس میں خواتین باڈی بلڈرز کو پوز دیتے ہوئے دکھایا گیا، جس کے نتیجے میں سابق میئر اور کانگریس لیڈر پارس سکلیچا نے پٹیل اور کشیپ پر "بے حیائی" کا مظاہرہ کرنے کا الزام لگایا۔

ریاستی بی جے پی کے ترجمان ہتیش باجپائی نے یہ دعویٰ کرتے ہوئے جوابی حملہ کیا کہ کانگریس خواتین کو کھیلوں میں نمایاں کارکردگی کا مظاہرہ کرتے ہوئے نہیں دیکھنا چاہتی، جب کہ تقریب کے کچھ منتظمین نے پولیس کو ایک میمورنڈم پیش کیا جس میں کانگریس رہنماؤں کے خلاف کارروائی کا مطالبہ کیا گیا۔

اپنے ویڈیو بیان میں، باجپئی نے کہا، "کانگریس والے خواتین کو ریسلنگ، جمناسٹک یا تیراکی میں حصہ لیتے ہوئے نہیں دیکھ سکتے، کیونکہ یہ دیکھ کر ان کے اندر کا شیطان بیدار ہو جاتا ہے۔ وہ کھیل کے میدان میں خواتین کو گندی نظروں سے دیکھتے ہیں۔ کیا انہیں شرم نہیں آتی؟" دریں اثنا، مدھیہ پردیش کانگریس کے سربراہ کمل ناتھ کے میڈیا ایڈوائزر پیوش بابلے نے وزیر اعلیٰ شیوراج سنگھ چوہان سے معافی مانگنے کے لئے کہا ہے اور کہا کہ یہ تقریب وزیر اعلی کی سالگرہ کے موقع پر منعقد ہوئی اور یہ تقریب ہندوؤں اور بھگوان ہنومان کی بے عزتی ہے۔ بابلے نے کہا کہ ان کی پارٹی "فحاشی کی حمایت کرنے پر" ٹیلی ویژن مباحثوں میں باجپائی کا بائیکاٹ کرے گی۔