کرناٹک: یدیورپا کے لئے آسان نہیں ہے کابینہ کی توسیع

کرناٹک کے وزیر اعلی بی ایس یدیورپا نے بدھ کے روز پارٹی ہائی کمان سے گرین سگنل ملنے کے بعد اپنی کابینہ میں سات سے آٹھ نئے اراکین کو شامل کرنے کا فیصلہ کیا ہےلیکن ان کےلئے ایسا کرنابہت مشکل کام ہے کیونکہ اس توسیع کے بعد ان کے خلاف ناراضگی بڑھ سکتی ہے۔وزیر اعلی یدیو رپا اس ناراضگی کی وجہ سے ہی کابینہ کی توسیع ٹالتے آ رہےہیں۔

گورنر وجوبھائی والا کابینہ کے نئے وزراء کو سہ پہر ساڑھے تین بجے گورنر ہاؤس کے گلاس ہاؤس میں حلف دلائیں گے۔ تاہم، مسٹر یدیورپا نے نامہ نگاروں سے گفتگو کے دوران ان لوگوں کے نام بتانے سے انکار کردیا، جنہیں کابینہ میں شامل کیا جائے گا۔ نام نہ بتانےکی سب سے بڑی وجہ یہی ہے کہ وزیر اعلی کےاوپر بہت زبردست دباؤ ہے۔

چونکہ کابینہ میں صرف سات نشستیں خالی ہیں، اس وجہ سے توسیع کے لئے کسی ایک وزیر کو اپنے عہدے سے استعفیٰ دینا پڑسکتا ہے۔ وزیر اعلی کس سے استعفی دلوائیں گے یا نہیں دلوائیں گےدونوں ہی صورتوں میں ان کے لئے راہ آسان نہیں ہے۔

کانگریس- جے ڈی (ایس) مخلوط حکومت کو چھوڑ کر بی جے پی حکومت کے قیام کی راہ ہموار کرنے کے لئے تین ارکان اسمبلی ایم ٹی بی ناگراج، آر شنکر اور منی رتنا کو کابینہ میں شامل کیے جانے کا امکان ہے۔ذرائع نے بتایا کہ بی جے پی کے ایم ایل اے امیش کٹی کی بھی حلف برداری متوقع ہے، جن کو وزیر اعلی نے وزیر کے عہدے کی یقین دہانی کرائی تھی۔