یوپی انتخابات: کھلے میں وی وی پیٹ پرچیاں برآمد ہونے سنسنی، بی ایس پی امیدوار کا دوبارہ ووٹنگ کا مطالبہ

چندولی: اتر پردیش میں اسمبلی انتخابات کے لیے ووٹنگ ہو چکی ہے اور تمام امیدواروں کی قسمت ای وی ایم میں قید ہے۔ کل یعنی 10 مارچ کو ووٹوں کی گنتی ہونی ہے لیکن گنتی سے قبل ہی سماج وادی پارٹی (ایس پی)، بہوجن سماج پارٹی (بی ایس پی) اور کانگریس نے ای وی ایم کے حوالہ سے سوال اٹھانے شروع کر دیئے ہیں۔

آج تک کی رپورٹ کے مطابق ای وی ایم پر سوالات کے درمیان مشرقی اتر پردیش کے چندولی میں کھلے میں وی وی پیٹ کی پرچیاں برآمد ہونے کے بعد ہلچل مچ گئی ہے۔ چندولی ضلع کی سید راجہ اسمبلی سیٹ سے بی ایس پی امیدوار امت یادو نے پورے واقعہ کی جانچ کا مطالبہ کیا ہے۔ انہوں نے اس سیٹ پر دوبارہ الیکشن کرانے کا بھی مطالبہ کیا ہے۔

امیت یادو نے الزام لگایا کہ وی وی پیٹ کی کاپیاں انہیں سید راجہ اسمبلی کے اماد پور پولنگ بوتھ کے قریب پڑی ملی تھیں۔ امت یادو کا یہ بھی الزام ہے کہ یہاں سینکڑوں کی تعداد میں پرچیاں پڑی ہوئی تھیں۔ جیسے ہی یہ معاملہ منظر عام پر آیا، بی ایس پی کارکن مشتعل ہو گئے۔ بی ایس پی امیدوار امت یادو کا الزام ہے کہ انہیں جو پرچیاں ملی ہیں ان میں ایس پی، بی ایس پی سمیت کئی دیگر پارٹیوں کی وی وی پیٹ کی پرچیاں ہیں لیکن ان میں بی جے پی سے متعلق کوئی پرچی نہیں ہے۔ لہذا گڑبڑی کئے جانے کا اندیشہ ہے۔

واقعہ کے خلاف بی ایس پی امیدوار اپنے حامیوں کے ساتھ دھرنے پر بیٹھ گئے۔ دوسری جانب آدھی رات کے اس واقعہ کی اطلاع ملتے ہی انتظامی عملے میں کھلبلی مچ گئی۔ آناً فاناً میں ضلع انتظامیہ کے لوگوں نے بی ایس پی کارکنوں سے ملاقات کی اور پورے معاملے کی جانچ کے بعد کارروائی کرنے کی یقین دہانی کروائی۔

اے ڈی ایم اونیش کمار نے کہا کہ ’’بہوجن سماج پارٹی کے ضلع صدر نے بتایا ہے کہ انہیں کسی بوتھ پر وی وی پیٹ کی پرچیاں ملی ہیں۔ اس حوالے سے شکایت کی گئی تھی۔ ان کی درخواست لے لی گئی ہے۔ ضلع مجسٹریٹ سے بھی بات ہوئی ہے اور قواعد کے مطابق کارروائی کی جائے گی۔‘‘