یوپی دسویں اور بارہویں بورڈ کا نتیجہ جاری، پرنس اور دِویانشی نے کیا ٹاپ

اتر پردیش کے دسویں اور بارہویں بورڈ امتحانات کے نتائج کا آج اعلان کر دیا گیا۔ دسویں کلاس میں جہاں فتح پور کے پرنس پٹیل نے ٹاپ کیا ہے، وہیں بارہویں درجہ میں فتح پور کی ہی دِویانشی کو اوّل مقام حاصل ہوا ہے۔ ہائی اسکول و انٹرمیڈیٹ کے امتحانات کے نتائج کو دیکھنے سے اندازہ ہوتا ہے کہ ایک بار پھر لڑکیوں نے لڑکوں کے مقابلے زیادہ بہتر ریزلٹ دیا ہے۔

ہائی اسکول امتحان کے نتائج میں پرنس پٹیل نے 97.67 نمبر حاصل کر پہلا مقام ضرور حاصل کیا ہے، لیکن ٹاپ-10 طلبا میں 7 مقامات پر لڑکیاں قابض ہیں۔ یعنی لڑکوں کے مقابلے میں لڑکیوں کی کارکردگی بہتر رہی ہے۔ پرنس پٹیل کے بارے میں بتایا جاتا ہے کہ وہ غریب کسان کا بیٹا ہے جس کا خواب فوج میں داخل ہو کر ملک کی خدمت کرنا ہے۔

دوسری طرف انٹرمیڈیٹ امتحان میں اول مقام حاصل کرنے والی دِویانشی کو 95.40 نمبر حاصل ہوئے ہیں۔ دوسرے مقام پر انشیکا یادو اور یوگیش پرتاپ سنگھ مشترکہ طور پر ہیں جنھیں 95 فیصد نمبر حاصل ہوئے ہیں۔ اگر ٹاپ-10 کی بات کی جائے تو اس میں لڑکیوں کی تعداد 5 ہے۔ یعنی انھوں نے لڑکوں کو زبردست ٹکر دی ہے۔