یو پی: قنوج ٹرک-بس ٹکر میں ہلاک 20 افراد کے تئیں پی ایم مودی، راہل اور پرینکا کا اظہارِ غم

اتر پردیش کے قنوج میں ڈبل ڈیکر بس اور ٹرک میں زبردست ٹکر کے بعد لگی آگ میں 20 لوگوں کی موت ہو گئی جب کہ کم از کم 21 زخمی افراد کا علاج اسپتال میں چل رہا ہے۔ اس حادثہ کے بعد پی ایم نریندر مودی، یو پی کے وزیر اعلیٰ یوگی آدتیہ ناتھ اور کانگریس لیڈران راہل گاندھی و پرینکا گاندھی نے افسوس کا اظہار کیا ہے۔ پی ایم نریندر مودی نے اس واقعہ کے تعلق سے ٹوئٹ کرتے ہوئے لکھا ہے کہ ’’اتر پردیش کے قنوج میں ہوئے سڑک حادثہ کے بارے میں جان کار بہت تکلیف ہوئی۔ اس واقعہ میں کئی لوگوں کو اپنی جان گنوانی پڑی ہے۔ میں مہلوکین کے اہل خانہ کے تئیں اپنی ہمدردی کا اظہار کرتا ہوں، ساتھ ہی زخمیوں کے جلد صحت یاب ہونے کی دعا بھی کرتا ہوں۔‘‘

راہل گاندھی نے اس واقعہ کے تعلق سے کیے گئے ٹوئٹ میں اپنی تکلیف ظاہر کرتے ہوئے لکھا ہے کہ ’’قنوج میں سڑک حادثے میں بس اور ٹرک کی ٹکر کے درمیان لگی آگ سے 20 لوگوں کی موت اور متعدد لوگوں کے زخمی ہونے کی خبر سے صدمے میں ہوں۔ مہلوکین کے اہل خانہ کے تئیں میں اپنی گہری ہمدردی ظاہر کرتا ہوں اور زخمیوں کے جلد صحت یاب ہونے کے لیے دعا گو ہوں۔‘‘

کانگریس جنرل سکریٹری پرینکا گاندھی نے اپنے ٹوئٹ میں کہا ہے کہ ’’قنوج میں ہوا حادثہ بہت تکلیف دہ ہے۔ ایشور غمزدہ گھر والوں کو اس تکلیف کو برداشت کرنے کی قوت دے۔ یو پی کانگریس کے ریاستی صدر اجے کمار جائے واقعہ پر پہنچ کر متاثرین کو سہارا دے رہے ہیں۔ اس مشکل وقت میں متاثرہ لوگوں اور مسافروں کو ہر ممکن مدد ملنی چاہیے۔‘‘

وزیر اعلیٰ یوگی آدتیہ ناتھ نے ٹکر کے بعد بس میں لگنے والی آگ سے ہوئے جانی نقصان کے تئیں اظہارِ افسوس کیا ہے۔ انھوں نے واقعہ کے بعد کہا کہ ’’قنوج ضلع میں ہوئے دردناک حادثہ میں ہوئی لوگوں کی موت کی خبر سے من پریشان ہے۔ پربھو شری رام سے مہلوکین کی روح کے سکون کے لیے دعا کرتا ہوں اور حادثہ میں زخمی افراد کے جلد صحت یاب ہونے کا تمنائی ہوں۔ میری ہمدردی غمزدہ اہل خانہ کے ساتھ ہے۔‘‘ وزیر اعلیٰ یوگی آدتیہ ناتھ نے مزید کہا کہ زخمیوں کے علاج میں ہر ممکن مدد کی جا رہی ہے اور انھیں 50 ہزار روپے کا معاوضہ دیا جائے گا۔ مہلوکین کے گھر والوں کو 2 لاکھ روپے تک کا معاوضہ دیئے جانے کا بھی اعلان وزیر اعلیٰ نے کیا۔

واضح رہے کہ فرخ آباد کی سلیپر بس گوسائی گنج سے سواریاں لے کر جے پور جا رہی تھی۔ قنوج کے چِھبرا مئو سے تقریباً 4 کلو میٹر دور بیور کی طرف سے آ رہے تیز رفتار ٹرک سے ٹکر ہوتے ہی دونوں گاڑیوں میں آگ لگ گئی۔ آگ اتنی زبردست تھی کہ بس میں سوار مسافروں کو سنبھلنے کا موقع ہی نہیں ملا۔ اس آگ میں کم از کم 20 لوگ زندہ جل کر ہلاک ہو گئے۔ عینی شاہدین کا کہنا ہے کہ آگ اتنی ہلاکت خیز تھی کہ لوگ آگ سے بچنے کی کوشش بھی نہیں کر پائے۔