اتر پردیش میں کورونا کا قہر، حکومت نے عدالت میں پیش کی اپنی کارکردگی رپورٹ 

پریاگ راج:08اپریل(یواین آئی) اترپردیش میں کورونا وائرس کےبڑھتے معاملوں کے پیش نظر الہ آباد ہائی کورٹ میں جاری مفاد عامہ کی عرضی پر سماعت ہوئی۔

ریاست و مرکزی حکومت نے اس ضمن میں کئے گئے اقدامات کی جانکاری دی اور دستاویزات سمیت عملدرآمد رپورٹ پیش کی۔ عرضی کی سماعت کررہے چیف جسٹس گوند ماتھر اور جسٹس سدھارتھ ورما کی ڈویژن بنچ نے سماعت کے لئے اگلی تاریخ 19اپریل طے کی ہے۔

ریاستی حکومت کی رپورٹ میں بتایا گیا ہے کہ عدالت کی ہدایت کے مطابق زیادہ انفکشن والے اضلاع میں نائٹ کرفیو لگانے کا فیصلہ کیا گیا ہے۔پنچایت انتخابات میں سوشل ڈسٹینسنگ اور کووڈ پروٹوکول کے اصولوں پر سختی سے عمل کرایا جارہا ہے شادی و دیگر تقریبات میں بھیڑ کو قابو میں کرنے کے لئے تعداد کو محدود کردیا گیا ہے۔

سڑکوں پر بھیڑ بھاڑ روکنے اور لازمی طور سے ماسک پہننے کے اصولوں پر سختی سے عمل کرایا جارہا ہے۔ معلوم ہو کہ یوپی میں بڑھ رہے کورونا انفکشن کو دیکھتے ہوئے ہائی کورٹ نے حکومت سے کہا تھا کہ وہ ریاست میں نائٹ کرفیو لگانے پر غوروخوض اور ٹیکہ کاری کی رفتار بڑھائے۔