ایگزٹ پول کے ذریعہ ووٹ چوری کرنے کی ہو رہی کوشش: اکھلیش یادو

سماجوادی پارٹی صدر اکھلیش یادو نے 10 مارچ کو برآمد ہونے والے یوپی اسمبلی انتخاب کے نتائج سے پہلے سنگین الزامات عائد کیے ہیں۔ انھوں نے کہا ہے کہ ایگزٹ پول کے ذریعہ ایسا ماحول بنانے کی کوشش ہو رہی ہے کہ بی جے پی جیت رہی ہے۔ اکھلیش یادو نے منگل کے روز میڈیا سے بات کرتے ہوئے کہا کہ اتر پردیش کا انتخاب جمہوریت کی آخری لڑائی ہے۔ اس کے بعد لوگوں کو انقلاب کرنا ہوگا تبھی بدلاؤ آئے گا۔ میں اپنی پارٹی کے لوگوں سے کہوں گا کہ جہاں پر مشینیں رکھی گئی ہیں، وہاں پر جب تک ووٹ شماری نہ ہو جائے تب تک کسی کا آنا جانا نہ ہو اور اس پر نظر بنائے رکھیں۔

اکھلیش نے ایگزٹ پول پر سوال اٹھاتے ہوئے کہا کہ کل جو ایگزٹ پول کے نتائج آئے ہیں، اس سے یہ لوگ یہ سوچ بنانا چاہتے ہیں کہ بی جے پی جیت رہی ہے۔ اس سے وہ اگر چوری بھی کریں گے تو بھی پتہ نہ لگ سکے گا کہ چوری ہوئی ہے۔ یوپی کے سابق وزیر اعلیٰ نے اسے جمہوریت کے لیے بہت بڑا خطرہ بتایا ہے۔ سماجوادی پارٹی سربراہ نے کہا کہ آخر کیا وجہ ہے کہ بغیر سیکورٹی کے ای وی ایم مشینوں کو لے جایا جا رہا ہے۔ بغیر امیدوار کو جانکاری دیے آپ ای وی ایم کو ایک جگہ سے دوسری جگہ نہیں لے جا سکتے ہیں۔ انھوں نے سوال کیا کہ آخر سیکورٹی فورسز کے ساتھ ای وی ایم کیوں نہیں جا رہی تھیں۔

سماجوادی پارٹی چیف اکھلیش یادو کا الزام ہے کہ ’’وارانسی کے ضلع مجسٹریٹ مقامی امیدواروں کو کوئی جانکاری دیے بغیر ای وی ایم لے جا رہے ہیں۔ انتخابی کمیشن کو اس پر غور کرنا چاہیے۔‘‘ انھوں نے مزید کہا کہ ایگزٹ پول اس لیے کیے گئے ہیں تاکہ جو چوری کی جائے اسے ڈھکا جا سکے۔ اکھلیش یادو نے دعویٰ کیا کہ بنارس اور ایودھیا میں سماجوادی پارٹی جیت رہی ہے۔ اس کے ساتھ ہی اتحاد 300 سیٹوں تک پہنچ جائے گا اور یوپی میں ان کی ہی حکومت بنے گی۔