بیٹے نے کہا ’عتیق کو یوپی پولیس نے مارا‘، تو نائب وزیر اعلیٰ کیشو موریہ نے بولا ’بچہ ہے، سیاست نہیں سمجھتا‘

اتر پردیش کے نائب وزیر اعلیٰ کیشو پرساد موریہ کے بیٹے یوگیش موریہ کی ایک ویڈیو خوب وائرل ہو رہی ہے۔ یہ ویڈیو کوشامبی کے بھروارا نگر پالیکا چیئرمین کی حلف برداری تقریب کی ہے۔ اس تقریب میں کیشو موریہ کے بیٹے یوگیش موریہ نے بھی لوگوں سے خطاب کیا۔ انھوں نے تقریر میں اتر پردیش حکومت کی خوب تعریف کی۔ ساتھ ہی وہاں موجود ضلع مجسٹریٹ اور پولیس کی بھی تعریفوں کے پل باندھے۔ تعریف کرتے کرتے یوگیش نے کہہ دیا کہ ’’اب آپ کی پولیس اعظم خان کی بھینس تلاش نہیں کرتی، بلکہ عتیق کو گولی مارنے کا کام کرتی ہے...۔‘‘ یوگیش کی اس تقریر پر خوب تالیاں بجی تھیں۔ اس ویڈیو کو کئی لوگوں نے سوشل میڈیا پر پوسٹ کیا۔

اس بارے میں جب نائب وزیر اعلیٰ کیشو موریہ سے پوچھا گیا تو انھوں نے ہنستے ہوئے اسے ٹال دیا۔ انھوں نے کہا کہ ’’وہ ابھی بچہ ہے اور سیاست نہیں سمجھتا۔‘‘ انھوں نے کہا کہ ابھی اسے سیاست کی اتنی سمجھ نہیں ہے کہ کب کیا بولنا ہے۔

واضح رہے کہ عتیق احمد اور اس کے بھائی کی پریاگ راج میں پولیس حراست کے دوران اس وقت گولی مار کر سر عام قتل کر دیا گیا تھا جب پولیس ان دونوں کو میڈیکل چیک اَپ کے لیے لے کر جا رہی تھی۔ تمام میڈیا کی موجودگی میں تین لوگوں نے عتیق اور اس کے بھائی پر کئی گولیاں چلائی تھیں۔ دونوں کی موقع پر ہی موت ہو گئی تھی۔ تینوں قاتلوں نے موقع پر ہی پولیس کے سامنے خود سپردگی کر دی تھی۔ اس واقعہ پر کافی ہنگامہ ہوا تھا جس کے بعد یوپی حکومت نے ایک کمیشن بنا کر معاملے کی جانچ کا حکم دیا تھا۔