تہواروں کے موسم میں مہنگائی پر بی جے پی حکومت خاموش: پرینکا گاندھی

کانگریس کی جنرل سکریٹری پرینکا گاندھی نے بی جے پی حکومت پر سخت تنقید کرتے ہوئے کہا ہے کہ تہوار وں کے اس موسم میں مہنگائی نے عام لوگوں کو پریشان کر دیا ہے۔ انہوں ٹوئٹ کرکے لکھا ہے کہ ’’پورے اتر پردیش میں تہواروں کے موسم میں مہنگائی عام لوگوں پرقہر بن کر ٹوٹ پڑی ہے۔ سبزیوں کے دام آسمان چھو رہے ہیں۔ کام دھندے پہلے سے ٹھپ ہیں۔ لیکن کروڑوں روپے جھوٹی تشہیر پر خرچ کرنے والی بی جے پی حکومت عوام کی پریشانیوں پر خاموش ہے۔‘‘

پرینکاگاندھی نے اپنے اس ٹوئٹ کےساتھ سبزیوں کی قیمتیں بھی ٹوئٹ کی ہیں۔ واضح رہے کورونا وبا کی وجہ سے بڑی تعداد میں لوگ بے روزگار ہوگئے ہیں اور کئی ماہ سے کاروبار نہ ہونے کی وجہ سے کاروباری لوگ بھی پریشان ہیں ایسے میں بڑھتی مہنگائی نے عوام کی کمر توڑ دی ہے۔

سیاسی مبصرین کی رائے ہے کہ تہواروں کےاس موسم کا ذکر کرتے ہوئے کانگریس جنرل سکریٹری پرینکا گاندھی نےجس تشویش کا اظہار کیا ہے اس کو حکومت کو سنجیدگی سے لینا چاہیے۔ واضح رہے جس تشہیر کا پرینکا گاندھی نے ذکر کیا ہے وہ اترپردیش حکومت کے ذریعہ چلائی جارہی تشہیر ہے، جس پر حکومت کے کروڑوں روپے خرچ ہو رہے ہیں۔ یہ تشہیر ٹی وی اور اخباروں کے ذریعہ چلائی جا رہی ہے۔

واضح رہے گزشتہ کچھ دنوں سےملک کے کئی حصوں میں سبزیوں کی قیمتیں آسمان چھو رہی ہیں اور یہ قیمتیں عوام کے لئے بڑا مسئلہ بن کر سامنے آئی ہیں۔