مرکزی وزیر مختار عباس نقوی نے دہلی حج کیمپ کا کیا دورہ

نئی دہلی: عازمین حج کی تیاریاں زور و شور سے جاری ہیں اور مرکزی وزیر برائے اقلیتی امور مختار عباس نقوی عازمین حج کی سہولت کے لیے دہلی اسٹیٹ حج کمیٹی کی طرف سے کی گئی تیاریوں کا معائنہ کیا۔ اس موقع پر دہلی اسٹیٹ حج کمیٹی کے چیئرمین مختار احمد نے مرکزی وزیر مختار عباس نقوی کا استقبال کیا اور انہیں پھولوں کا گلدستہ پیش کیا۔ اس موقع پر دہلی اسٹیٹ حج کمیٹی کے رکن سید شاداب حسین رضوی اشرفی، ایگزیکٹو آفیسر جاوید عالم خان، ڈپٹی ایگزیکٹو آفیسر محسن علی، عرفان احمد اور دیگر بھی موجود تھے

اس موقع پر مختار عباس نقوی نے تمام عازمین حج کے لیے نیک خواہشات کا اظہار کرتے ہوئے کہا کہ آپ مقدس مقام پر جا رہے ہیں وہاں لوگوں کی صحت و تندرستی، ملک کی ترقی اور امن کے لیے دعا کریں۔ میڈیا سے خطاب کرتے ہوئے وزیر مملکت نے کہا کہ ہم نے دیانتداری سے سبسڈی فراڈ کو ختم کیا ہے۔ انہوں نے کہا کہ اس سال سعودی عرب کی حکومت نے کچھ ٹیکسوں میں اضافہ کیا ہے اس کے باوجود ہم نے کم ازکم شرح پر حج کرانے کی کوشش کی ہے۔

مختار احمد نے کہا کہ حج ایک مقدس سفر ہے اور اس سفر پر جانے والے تمام لوگ مقدس ہیں اور ان کی خدمت کرنا ایک باوقار کام ہے، ہم سب مل کر عازمین حج کی سہولتوں کا پورا خیال رکھ رہے ہیں اور انہیں زیادہ سے زیادہ سہولیات فراہم کرنے کے لیے کوشش کر رہے ہیں۔ اس موقع پر حسن باقر کاظمی، عرفان احمد اور جناب نفیس احمد نے اپنے مشترکہ بیان میں کہا کہ ہم عازمین حج کی خدمت کے لیے ہمہ وقت تیار ہیں اور عازمین حج کی سہولیات کے لیے پرعزم ہیں۔