عمر عبد اللہ نے بارہمولہ لوک سبھا سیٹ کے لئے کاغذات نامزدگی جمع کئے

سری نگر: نیشنل کانفرنس کے نائب صدر اور جموں و کشمیر کے سابق وزیر اعلیٰ عمر عبد اللہ نے جمعرات کی صبح بارہمولہ لوک سبھا سیٹ کے لئے کاغذات نامزدگی جمع کئے۔

وہ کارکنوں کی ایک بڑی تعداد کے ساتھ جمعرات کی صبح بارہمولہ پہنچے جہاں انہوں نے ضلع مجسٹریٹ منگا شرپا کے سامنے کاغذات نامزدگی دائر کئے۔ اس موقع پر پارٹی کے سینئر لیڈران بھی ان کے ہمراہ تھے۔

بتادیں بارہمولہ لوک سبھا سیٹ کے لئے اب تک 11 امید واروں نے کاغذات نامزدگی جمع کئے ہیں جن میں پیپلز کانفرنس کے صدر سجاد غنی لون اور جیل میں قید سابق رکن اسمبلی انجینئر رشید خاص طور پر قابل ذکر ہیں۔

محبوبہ مفتی کی سربراہی والی پیپلز ڈیموکریٹک پارتی (پی ڈی پی) نے سابق رکن راجیہ سبھا فیاض احمد میر کو یہاں سے میدان میں اتارا ہے۔ اس لوک سبھا سیٹ کے لئے 20 مئی کو پولنگ ہوگی۔ واضح رہے کہ جموں و کشمیر کی پانچ لوک سیٹوں میں سے دو سیٹوں کی پولنگ ہوئی۔

(یو این آئی ان پٹ کے ساتھ)