راجستھان: ادے پور میں اندوہناک سڑک حادثہ، 5 افراد جاں بحق

ادے پور: راجستھان کے ادے پور ضلع میں جمعرات کی رات ایک اندوہناک سڑک حادثہ پیش آیا جس میں کار اور ٹرک کے درمیان تصادم کے نتیجے میں 5 افراد جاں بحق ہو گئے۔ حادثہ ادے پور کے سکھیر تھانے کے علاقے امبری میں رات تقریباً 12 بجے پیش آیا، جب ایک کار غلط لین میں داخل ہو کر ٹرک سے ٹکرا گئی۔

حادثے میں کار میں موجود تمام 5 افراد شدید زخمی ہو گئے، جنہیں فوری طور پر قریبی اسپتال منتقل کیا گیا، مگر وہ جانبر نہ ہو سکے۔ جاں بحق ہونے والوں میں ایک پولیس ہیڈ کانسٹیبل کا بیٹا بھی شامل ہے۔

ابتدائی معلومات کے مطابق، کار ڈرائیور نے حادثے سے بچنے کی کوشش کی لیکن جگہ کی کمی کے باعث کار براہِ راست ٹرک سے جا ٹکرائی۔ تصادم کے نتیجے میں کار مکمل طور پر تباہ ہو گئی۔ پولیس نے ٹرک کو ضبط کر کے واقعے کی تحقیقات شروع کر دی ہیں اور حادثے کی وجوہات جاننے کی کوشش جاری ہے۔

حادثے کی اطلاع ملتے ہی سکھیر تھانے کی پولیس موقع پر پہنچی اور جاں بحق افراد کی لاشوں کو پوسٹ مارٹم کے لیے اسپتال منتقل کیا۔یہ حادثہ شمالی ہندوستان میں بڑھتے ہوئے ٹریفک حادثات کی ایک اور مثال ہے۔ دھند کے باعث شمالی بھارت میں حادثات میں اضافہ دیکھا جا رہا ہے۔

اسی طرح کے حادثے میں 20 نومبر کو اتر پردیش کے ضلع بجنور میں ٹریکٹر اور موٹر سائیکل کے تصادم میں تین افراد جاں بحق ہوئے تھے۔ 16 نومبر کو بجنور کے قریب ایک اور افسوسناک حادثے میں 7 افراد کی موت ہوئی، جب ایک تیز رفتار کار نے ایک آٹو رکشہ کو ٹکر ماردی۔