متحدہ عرب امارات نے ہندوستانیوں کیلئے ویزا قوانین نرم کئے

نئی دہلی: متحدہ عرب امارات نے ہندوستان کے ساتھ دو طرفہ تعلقات کو مضبوط بنانے کے ارادے سے ہندوستانی شہریوں کے لئے ویزا قواعد و ضوابط کو مزید نرم کردیا ہے۔جاری ہونے والے ایک بیان کے مطابق نئی دہلی میں متحدہ عرب امارات (یو اے ای) کے سفیر احمد البانہ نے کہا کہ متحدہ عرب امارات کی حکومت نے برطانیہ اور یورپی یونین ممالک میں ریزیڈنٹ پرمٹ والے ہندوستانی پاسپورٹ ہولڈروں کی آمد و رفت پر ویزا قواعد میں مزید نرمی کرنے کا فیصلہ کیا ہے، جس کو کابینہ نے منظورکر لیا ہے۔ انہوں نے کہا کہ یہ فیصلہ گزشتہ سال متحدہ عرب امارات کے شیخ زائدالنہیا ن کے ہندوستان دورے پر دونوں ممالک کے درمیان متفقہ معاہدے کے مطابق کیا گیا ہے۔ ویزا قوانین میں کی گئی اس نرمی کے بعد آئندہ دنوں میں کچھ مزید اقدام اٹھائے جانے کا بھی اشارہ دیا گیا ہے، جس سے دونوں ممالک کے طویل مدتی دو طرفہ تعلقات مزید مضبوط ہوں گے۔