جموں و کشمیر میں دہشت گردوں کی دراندازی روکنے میں ناکام دو بڑے افسران کو عہدہ سے ہٹایا گیا

جموں و کشمیر میں دہشت گردوں کی دراندازی کم ہونے کا نام نہیں لے رہی ہے۔ اس کا خمیازہ جموں و کشمیر کے دو بڑے افسران کو بھگتنا پڑا ہے۔ بی ایس ایف کے ڈائریکٹر جنرل نتن اگروال اور اسپیشل ڈائریکٹر جنرل وائی بی کھورانیا کو ان کے عہدوں سے ہٹا دیا گیا ہے۔ جموں و کشمیر میں دہشت گردوں کی دراندازی روکنے میں ناکام رہنے کے سبب حکومت ہند کے ذریعہ اٹھایا گیا یہ ایک بڑا ایڈمنسٹریٹو قدم ہے۔ مرکز کے زیر انتظام خطہ جموں و کشمیر میں گزشتہ ایک سال سے لگاتار دہشت گردوں کی دراندازی دیکھنے کو مل رہی ہے اور کئی بار تصادم میں جوانوں کی شہادت بھی ہوئی ہے۔

میڈیا رپورٹس میں بتایا جا رہا ہے کہ گزشتہ ایک ماہ میں نتن اگروال اور وائی بی کھورانیا نے جموں و کشمیر بین الاقوامی سرحد اور لائن آف کنٹرول کا دورہ کیا تھا، جو کہ پاکستان سے ملحق ہے۔ کئی اہم میٹنگوں میں بھی ان افسران نے حصہ لیا تھا، لیکن اس کا کوئی خاطرہ خواہ اثر دکھائی نہیں دے رہا تھا۔ اس کے علاوہ پنجاب سیکٹر سے لگاتار ہو رہی دہشت گردوں کی دراندازی کو بااثر طریقے سے کنٹرول نہ کر پانا اس اس کارروائی کی ایک بڑی وجہ ہے۔

قابل ذکر ہے کہ گزشتہ کئی سالوں میں ایسا پہلی بار ہوا ہے جب نیم فوجی دستوں کی قیادت کر رہے دو بڑے افسران کو اس طریقے سے عہدہ سے دستبردار کر دیا گیا ہو۔ امید ظاہر کی جا رہی ہے کہ جلد ہی ان دونوں عہدوں پر نئی تقرری کی جائے گی۔