سرمایہ کاری کے نام پر کروڑوں کی لوٹ ، دو ڈائریکٹر گرفتار

اتراکھنڈ کے ضلع چمپاوت کی پولیس نے چٹ فنڈ کمپنی کے نام پر لاکھوں روپے ہڑپنے کے الزام میں جن ہت نیدھی لمیٹڈ کے دو ڈائریکٹروں کو گرفتار کیا ہے۔

پولس نے بتایا کہ جن ہت نیدھی لمیٹڈ کے دو ڈائریکٹروں کو چٹ فنڈ کمپنی کے نام پر لاکھوں روپے ہڑپنے کے الزام میں گرفتار کیا گیاہے۔ انہوں نے کہا کہ کمپنی کی سینئر مشیر پاروتی کلونی کی شکایت پر ٹنک پور میں مقدمہ درج کر کے تفتیش شروع کی گئی۔ تفتیش کے دوران پتہ چلا کہ چٹ فنڈ کمپنی بنا کر لاکھوں روپے ہڑپے گئے ہیں۔ چمپاوت کے لوہا گھاٹ میں بھی ملزمان نے 250 سے زائد سرمایہ کاروں پر ہاتھ صاف کیے ہیں جن کی مالیت لاکھوں روپے ہے۔ اس کے بعد پولس نے ملزم کی تلاش شروع کردی۔ جمعہ کے روز پولس نے مرادآباد سے کمپنی کے دو ڈائریکٹروں رویش کمار اور نگم سنگھ کو گرفتار کیا۔
پولس اس معاملے میں کمپنی کی ایک ڈائریکٹر ممتا یادو کو پہلے ہی گرفتار کر چکی ہے۔ پولس دیگر مفرور ملزمان کی تلاش میں مسلسل چھاپے مار رہی ہے۔

قابل ذکر ہے کہ جن ہت نیدھی لمیٹڈ کی طرف سے سال 2015 میں ضلع چمپاوب کے ٹنک پور اور لوہاگھاٹ میں دفاتر کھولے گئے تھے۔ کمپنی نے سرمایہ کاری کے نام پر تقریبا 550 لوگوں سے کروڑوں روپے جمع کئے اور جب لوگوں کے پیسے واپس کرنے کا وقت آیا تو یہ تمام لوگ بھاگ گئے۔