کسان تحریک میں سرگرم رہے کسان ایکتا مورچہ سمیت کئی ٹوئٹر ہینڈل پر پابندی

ایک طرف جب ملک کے شہری، سیاسی، سول سوسائٹی کے اراکین، صحافی، مصنفین اور دیگر سماجی کارکنان دہلی کے جنتر منتر پر جمع ہو کر حقوق انسانی کارکن تیستا سیتلواڑ کی گرفتاری کے خلاف احتجاج کر رہے تھے، اسی دوران کسان تحریک سے جڑے اور سرگرم کئی ٹوئٹر اکاؤنٹ کو بند کر دیا گیا ہے۔ کسانوں کی 40 تنظیموں کا اتحاد ’سنیوکت کسان مورچہ‘ نے پیر کے روز اس تعلق سے ناراضگی ظاہر کرتے ہوئے الزام عائد کیا کہ تحریک سے جڑے ٹوئٹر اکاؤنٹ کو بند کرنا مرکزی حکومت کے ذریعہ کیے جا رہے استحصال کی مثال ہے اور یہ پریشان کرنے کی کارروائی ہے۔

زرعی قوانین کے خلاف تقریباً ایک سال تک چلی کسان تحریک کی قیادت کرنے والے سنیوکت کسان مورچہ نے ایک بیان جاری کر کہا کہ تحریک سے جڑے ٹوئٹر اکاؤنٹس کو بغیر کسی تنبیہ یا قبل اطلاع دیے بند کر دیا گیا۔ مورچہ نے کہا کہ ’’جن اکاؤنٹس کو بند کیا گیا ہے، اس کو بند کرنے کے لیے مرکزی حکومت نے ایمرجنسی کی برسی کا دن منتخب کیا۔‘‘

سنیوکت کسان مورچہ کا کہنا ہے کہ ’’بی جے پی نے ٹوئٹر پر ہمارے اکاؤنٹس بند کرنے کے لیے دباؤ ڈالا تاکہ حکومت سے سوال پوچھنے والوں کی آواز کو دبایا جا سکے۔‘‘ مورچہ کے مطابق ’’کسان تحریک کے دوران جو نوجوان سرگرم تھے، اور پوری دنیا میں اپنی کوششوں سے کسان تحریک کی آواز پہنچا رہے تھے اور کسان ایکتا مورچہ اور ٹریکٹر ٹو ٹوئٹر نام کے ہینڈل سے تحریک کے خلاف جاری مختلف غلط جانکاریوں، فرضی خبروں اور افواہوں کی سچائی سامنے لا رہے تھے، ان اکاؤنٹس کو بند کر دیا گیا۔ ان اکاؤنٹس پر لاکھوں فالووَرس ہیں۔ کسان تحریک کے دوران ان ہینڈلس سے ساری جانکاریاں اور سرکار کے استحصال پر مبنی اطلاعات پوری دنیا تک پہنچی تھیں۔‘‘

سنیوکت کسان مورچہ نے ان اکاؤنٹس کو بحال کرنے کا مطالبہ کیا ہے اور ساتھ ہی حقوق انسانی کارکن تیستا سیتلواڑ کی گرفتاری کی سخت مذمت بھی کی ہے۔ واضح رہے کہ تیستا سیتلواڑ کو گجرات اے ٹی ایس نے گرفتار کیا ہے۔ بہر حال، کسان تنظیموں سے جڑے ٹوئٹر ہینڈلس کو بند کیے جانے کے تعلق سے مورچہ نے واضح لفظوں میں کہا کہ ’’مرکزی حکومت کے ذریعہ کسان تحریک سے جڑے ٹوئٹر اکاؤنٹس کو بند کروانا حقوق انسانی پر حملے کی بڑی سازش کا حصہ ہے۔‘‘