ٹوئٹر ملازمین کو ہمیشہ کے لیے ’گھر سے کام‘ کرنے کی ملے گی اجازت!

کورونا بحران کے پیش نظر پوری دنیا میں 'ورک فروم ہوم' یعنی گھر سے کام کرنے کا طریقہ ان کمپنیوں نے اختیار کیا ہے جو کہ ڈیجیٹل دنیا میں کام کر رہی ہیں۔ الیکٹرانک میڈیا، آئی ٹی کمپنیاں اور سوشل میڈیا میں کام کر رہے ملازمین بڑی تعداد میں گھر سے ہی کام کر رہے ہیں۔ سوشل نیٹورکنگ سائٹ ٹوئٹر نے بھی اپنے ملازمین سے گھر سے ہی کام کرنے کے لیے کہہ رکھا ہے۔ بلکہ تازہ ترین خبروں کے مطابق ٹوئٹر تو اپنے ایسے ملازمین کو ہمیشہ کے لیے گھر سے کام کرنے کی اجازت دینے کا ارادہ رکھتا ہے جو اس کے خواہشمند ہیں اور اس سے کام میں کسی طرح کا رخنہ نہ ہو۔

بتایا جاتا ہے کہ ٹوئٹر ملازمین نہ صرف کورونا وائرس کی وبا کے دوران بلکہ اس کے بعد بھی اگر وہ چاہیں تو ہمیشہ کے لئے اپنے گھروں سے کام کرسکتے ہیں۔ ٹوئٹر نے منگل کے روز ایک بیان جاری کرتے ہوئے کہا کہ ’’اگر ہمارے ملازمین گھر سے کام کرنے کی پوزیشن میں ہیں، اور وہ ایسا ہمیشہ کے لئے چاہتے ہیں تو ہم اسے پورا کرنے کی کوشش کریں گے‘‘۔

ٹوئٹر نے اپنے بیان میں حالانکہ اس بات کا بھی تذکرہ کیا ہے کہ ملازمین کے پاس سیکورٹی کو مدنظر رکھتے ہوئے کمپنی کے دفاتر میں کام کرنے کا متبادل کھلا رہے گا۔ بیان کے مطابق ٹوئٹر ستمبر سے پہلے اپنا دفتر نہیں کھولے گا اور اس سے مستثنٰی کوئی بھی کاروباری سفر نہیں ہوگا۔ ساتھ ہی یہ بھی فیصلہ لیا گیا ہے کہ اس سال کوئی اہتمام یعنی کسی بھی طرح کی تقریب کا انعقاد بھی نہیں کیا جائے گا۔