پرینکا چترویدی کی بیٹی کو ریپ کی دھمکی دینے والا شخص گرفتار

کانگریس کی ترجمان پرینکا چترویدی کی 10 سالہ بیٹی کو ریپ کی دھمکی دینے والے شخص گجرات کے احمدآباد سے گرفتار کر لیا ہے۔ گریش نام کا یہ ملزم راجستھان کے اجمیر کا رہائشی ہے اور اس نے پرینکا کو ٹوئٹر پر دھمکی دی تھی۔ ملزم کو گرفتار کر کے پوچھ گچھ کی جا رہی ہے۔ دہلی اور ممبئی پولس ملزم کو پکڑنے کے لئے مشترکہ مہم چلا رہی تھی۔

مندرسور معاملہ پر پرینکا چترویدی کے نام سے ایک فرضی میسج پھیلایا جا رہا تھا اسی کو لے کر ان کی بیٹی کے ریپ کی دھمکی دی گئی تھی۔ سوشل میڈیا پر وائرل ہو رہی ایک فرضی پوسٹ میں دکھایا گیا تھا کہ پرینکا چترویدی مندسور ریپ کے ملزم کی حمایت میں ہیں۔

بیٹی کا ریپ کرنے کی دھمکی ملنے کے بعد پرینکا چترویدی نے ممبئی کے گورے گاؤں تھانہ میں اس تعلق سے 2 جولائی کو معاملہ درج کرایا تھا۔ اس خبر کے منظر عام پر آنے کے بعد پرینکا کو ملک بھر کے لوگوں اور سیاسی جماعتوں کے رہنماؤں کا ساتھ ملا تھا اور سبھی نے ملزم کے خلاف سخت کارروائی کرنے کا مطالبہ کیا تھا۔